Keçken sene rusiye havfsızlıq küçleri 42 yaşındaki Ukrayina grajdanı, qırımtatar Diana Ğavrılükni (Abduraşıtova) Türkiyeden qaytqan soñ, anda tibbiy operatsiya keçirildi, Soçi ava limanında tuttılar. Soñra, onı «Devlet satqınlığı»nda qabaatlaylar. Bu aqqında «Suspilne Qırım» tutulğannıñ ömür arqadaşı Andriy Ğavrılükke esaslanıp haber etti.
Belli ki, apishanege alınğan soñ, qadınnı Abhaziyağa alıp kettiler, soñra ise rusiyeniñ SİZOsına avuştırdılar, anda, qorantanıñ aytqanına köre, onı eziyetley ediler ve tibbiy yardımnı bermey ediler. Şimdiki vaqıtta işğalciler onı, güya Ukrayina Silâlı Quvetlerine donat içün, «devlet satqınlığı»nda qabaatlaylar.
Onıñ aytqanına köre, Diana 2025 senesiniñ orta küz ayınıñ 31-de ana-babasını ve ağır hasta tizesini ziyaret etmek içün vaqtınca işğal etilgen Qırımğa yol alğanda tutuldı. Soçideki rusiyeniñ idaresi altındaki makeme onı tutqan soñ, sıñırcılarğa «boysunmağanı» içün 14 künlü memuriy tevqifni tayin etti.
Bu devirden soñ qadın qorantanen bağlanmadı, onı qıdırmağa başladılar. Soñra Diananı qanunsız Abhaziyağa alıp ketkeni belli oldı, ondan soñ ise rusiye federatsiyasınıñ Voronej vilâyetiniñ Borisoglıbsk şeerindeki №2 SİZOğa avuştırdılar.
Tutqınnıñ aqayı Borisoglıbskte bulunğan vaqıtta Dianağa beden zorbalığı yapılğanını bildirdi. Hususan, onı sorğu vaqtında ura ediler, tibbiy yardım olmağanından operatsiyadan soñki tikişler ayırıldı.
Soñra qadınnı Krasnodar şeerindeki SİZOğa keçirdiler, anda oña qarşı «devlet satqınlıq» maddesi sebebinden cinayet davası açıldı. Qorantanıñ aytqanına köre, makeme onıñ tutuvını profilaktik çaresi olaraq 2026 senesi qural ayınıñ 17-ge qadar uzatqan.
Diana Ğavrılük üç balanıñ anası. Onıñ aqayı, qoranta onı azat etmek içün advokatlar ve halqara uquq qorçalayıcı teşkilâtlarnen, şu cümleden BMT ve Qızıl Haçnen beraber çalışqanını ayttı.
️Ukrayina grajdanlarını “inkommunikado” statusında tutuv ameliyatı rusiye akimiyeti tarafından basım etüv, azaplarnı gizlev, insanlarnı qorçalav aqqından marum etüv basım alet olaraq çoqça qullanıla. Böyle areketler halqara gumanitar uquqnıñ qaba bozulmasına ve ukrayin grajdanlarına, şu cümleden qırımtatarlarğa qarşı sistemalı repressiyalarnıñ ilerideki delilidir – Qırımtatar Resurs Merkezi qayd ete.