İşğal makemesi tarafından 18 yıl apis cezasına mahküm etilgen, ağır hastalığı sebebinden azat etilgen Qırımnıñ siyasiy mabüsi, “Hizb ut-Tahrir” davasınıñ mabüsi Lenur Halilov endi ekinci aydan berli Arhangel vilâyetiniñ UFSVP bölge hastahanesinde buluna. Bu aqqında”Qırım birdemligi” onıñ apayı Umida Hudoyberdiyevağa esaslanıp bildire.
Qadınnıñ aytqanına köre, aqayı tahminen üç afta devamında bağlanmadı, çünki memuriyet uzun vaqıt devamında telefon subetini qabul etmey edi. Soñki vaqıtları Lenur Halilov apayınen qonuşa bildi.
“Küçü yoq” dep aytmaq – pek yaramay bir şey. Onı başqa bir hastahanege alıp ketmege isteyler, anda ekimler baqa bileler. Yalıñız ağrı kesici, analgin berile. Başqa bir şey yoq. O, ara-sıra vagonda otura, onıñ ayatı içün pek qorqam”, – dep tarif etti Umida Hudoyberdiyeva.
Bundan da ğayrı, kiçik ayıniñ ortasında siyasiy mabüsniñ apayı “Devlet hızmetleri” rusiye hızmeti vastasınen haber aldı, kiçik ayıniñ 1-nde rusiye sağlıq saqlav nazirligi Lenur Halilovğa III gruppa saqatlığını berdi ve oña tibbiy vastalarnen imtiyazlı teminlev aqqını berdi, lâkin, qorantasınıñ aytqanına köre, oña kerekli ilâclar alâ daa berilmey.
Hatırlatamız: 2019 senesi oraq ayınıñ 10-nda rusiye quvetçileri Aluştada, Qarasuvbazarda ve Aqmescitte qırımtatarlarnıñ evlerinde kütleviy tintüvler keçirdi. Neticede sekiz insan rusiyede yasaq etilgen “Hizb ut-Tahrir” teşkilâtında iştirak etkeninde qabaatlanıp tutuldı. Tutulğanlar arasında Lenur Halilov da bar edi.
2021 senesi armannıñ 16-nda işğalci “makemesi” onı 18 yılğa apiske aldı. 2025 senesi arman ayında Arhangelskniñ İsakogorsk rayon makemesi Lenur Halilovnı mahküm etilgenlerniñ azat etilmesi içün sebep ola bilgen ağır hastalıqlar cedveline kirgen ağır hastalıqlar sebebinden azat etmege qarar aldı. Faqat aynı yılnıñ orta küz ayında Arhangel vilâyet makemesi prokurornıñ muracaatını qanaatlendirip, qırımtatarnı koloniyağa qaytardılar.