QRM taqımı Almaniya Ombudsmeninen körüşti

January 13, 2023

Cumaaqşamı künü, 12 yanvarde, Ukrain siyasiy mahbüs künü, QRM reisi Eskender Bariyev , QRM menecerleri Zarema Bariyeva, Lüdmila Korotkih ve kommunikatsıya meneceri Tatyana Podvornãk FRG hakimiyetiniñ insan haqları ve gumanitar yardım sahasında vekãletlisi Luiza Amtsberg ile körüşti.

 QRM temsilcileri  Luizanı işğal etilgen Qırımda insan haqlarınıñ bozulması, ukraintaraflı faallilerge ve qırımtatarlarğa qarşı basqı ve yañı işğal etilgen Herson ve Zaporojye vilãyetlerdeki vaziyet haqqında haberdar ettiler.

‘Rusiye federatsiyası öz qanuncılıqnı işğal etilgen territoriyalarda haqsız amelge keçire, ayrıca, işğalcılar Qırım sakinlerini, Zaporojye ve Hersonda yaşağanlarnı ‘Hizb ut-Tahrir’, ‘İyegova şaatları’, ‘Noman Çelebicihan adına Batalyon’ dep adlandırılğan davalar boyunca tutuqlamağa, qaçırıp, Qırımğa ketirmege devam eteler. Olar hepisi sade, tınç adamlardır. Almaniya hakimiyeti siyasiy mahbüsler azat etilip, Ukrainağa qaytarılmasına yardım eter, degen ümüttemiz’,- dedi QRM reisi Eskender Bariyev.

Luiza Amtsberge Qırım siyasiy mahbüsler ve işğal etilgen Qırımdaki vaziyet haqqında QRM tarafından hazırlanğan bukletler taqdim etildi.

QRM temsilcileri RF tarafından yapılğan ekologik zarar ve yarımadada suv qıtlığı, rusiye hakimiyetniñ yarımadaki suv resurlarını mantıqsız işletkenini aydınlatqan ‘Qırım. Suvsuzlıq’ vesiqalı film haqqında añlattılar.

Şundan da ğayrı, musafirlerge  babalarını hapishanege oturtılğan balalarnıñ faciası haqqında ‘Babamnı qaytarıñız!’ vesiqalı filmniñ treylerni ve qırımtatarlarnıñ öz Vatanlarında yaşamaq haqqı oğrunda küreşi haqqında rolikni numayış ettiler.

 Luiza Amtsberg QRM-ne mühim işleri içün minnetdarlıq bildirip, işğal etilgen territoriyalarda insan haqlarınıñ bozuvları haqqında haberdar etmege çağırdı. Şundan da ğayrı, FRG hakimiyetiniñ insan haqları ve gumanitar yardım sahasında vekãletlisi QRMnen işğal etilgen territoriyalarda insan haqlarınıñ bozuvları haqqında bilgilerni qayd etmek ve darqatmaq meselesinde faal işbirlik başlanğanını qayd etti.