Çarşenbe künü, 20 martta, QRM OON insan haqları boyunca monitoring missiyasınıñ temsilcilerinen körüşüv keçirdi. İnsan haqları boyunca mutehassıslar işğal etilgen Qırımda insan haqlarını bozuvnen olğan vaziyetni, QRM faaliyetini añlatıp, ileride işbirlik yollarını muzakere ettiler.
Körüşüvde insan haqları boyunca mutehassıslar Diarmud Kuniff, Mariya Bilak, QRM reisi Eskender Bariyev, yurist Boris Babin, QRM yuristi Lüdmila Korotkih ve kommunikatsıya meneceri Tatyana Savçuk iştirak ettiler.
OON Monitoring missiyasınıñ temsilcileri ‘RF tarafından Qırım MC ve Aqyar şeheri işğal etilgeniniñ 10 yıllığı’ mevzusında maruzanı taqdim etip, vesiqada esas tendentsiyalar belgilengenini qayd ettiler.
‘Al-azırda 2024 senesi işğal etilgen Qırımda insan haqları bozuvlarınen bağlı 2 esabat içün malümat toplaymız. Şunıñ içün de işğal etilgen Qırım ve diger territoriyalarda insan haqları bozuvlarında aktual tendentsıyalar haqqında bilmege ister edik. Bu vaqıt içinde neler deñişti?’- qayd etti Diarmud Kuniff.
Şundan da ğayrı, OON Monitoring missiyasınıñ temsilcileri şuña diqqat çektiler ki, 2024 senesi QRM RF territoriyasında istenilmegen teşkilãt olaraq tanıldı.
‘Bu qarar işiñizge nasıl tesir etti? Halqara cemiyet bu aqta nasıl sizge yardım ete bilir?- meraqlandı Diarmud Kuniff.
Öz tarafından ise , QRM temsilciler işğal etilgen Qırımda insan haqları bozuvınen bağlı vaziyetni, qırımtatarlarğa ve ukraintaraflı faal cemiyetçilerge qarşı basqılar haqqında tarif ettiler. QRM idare yolbaşçısı Eskender Bariyev işğal etilgen Qırımda ve Zaporojye ve Herson vilãyetlerinde insan haqları bozuvlarınıñ tendentsıyalarını bildirdi.
‘Şubesiz ki, Qırımda insan haqları bozuvlarınıñ ilk sebebi- işğaldir. Yarımadanı işğalden qurtararaq insan haqlarınıñ bozuvlarını toqtatıp olurmız’,- dedi Bariyev.
O qayd etkenine köre, OON Halqara Mahkemeniñ qararından soñ işğalcılar tamır qırımtatar halqına basqı ve taqiplerini arttırdılar.
‘Böyle etip, mezkür qarardan soñ QRM istenilmegen teşkilãt olaraq tanıldı. Şundan da ğayrı, işğal etilgen terroriyalarda yerli ve regional Meclis azalarına binaen repressiyalar arttı. Endiden soñ işğalcılar qırımtatar halqına qarşı repressiyalar mevzusında halqara meydanlarda çıqışlar yapqan teşkilãtımıznıñ azalarını provokator, dep adlandıralar,’- añlattı.
Şundan da ğayrı, QRM ekspertleri ‘Mogilizatsıya’ informatsıon kampaniyası haqqında añlattılar. İşbu kampaniya çerçivesinde işğal etilgen territoriyalar sakinlerine seferberlikten qaçınmaq yolları kösterile ve bu esnasta iştirak etkenler haqqında malümat toplanıla.
Subetdeşler ileride işğal etilgen Qırımda ve Zaporojye ve Herson vilãyetlerinde insan haqları bozuvlarını qayd etmek saasında işbirlik haqqında añlaştılar.
OON Monitoring missiyasınıñ temsilcileri QRM tarafında hazırlanılğan Qırım reintegratsıyası boyunca teklifler ve ‘2020 senesi işğal etilgen Qırımda vaziyetniñ talili’ esabatını teslim ettiler.