Qural ayınıñ 14-nde Qırımtatar Resurs Merkeziniñ ofisinde “The Kyiv Independent” jurnalistleri ve temsilcileri Olesâ Bida ve Mıroslava Çayunnen ekinci iş körüşüvi olıp keçti. Qırımtatar Resurs Merkezi tarafından körüşüvde QRM-niñ İdare Reisi ve Qırımtatar Milliy Meclisiniñ azası Eskender Bariyev, QRM-niñ meneceri ve tesisçilerinden biri Zarema Bariyeva, uquqçı Lüdmıla Korotkıh, kommunikatsiyalar menecerleri Tetâna Savçuk ve Valentına Mancula iştirak ettiler.
Körüşüv devamında taraflar işğal etilgen Qırımda insan aqlarınıñ vaziyetini, Qırım siyasiy mabüsleriniñ qanunsız taqip etilüvini ve arbiy cinayetlerniñ belgilenüvini muzakere etmege devam ettiler. Qırımtatar halqınıñ vekillerine qarşı Qırım, em de Herson ve Zaporijjâ vilâyetlerinde yapılğan basqılarnıñ aktual tendentsiyalarına ayrı diqqat ayırıldı.
QRM-niñ meneceri Zarema Bariyeva, Qırımtatar Resurs Merkezi tarafından belgilengen siyasiy sebeplerden qanunsız taqiplerniñ çoqusı adiseleri aqqında tafsilâtlıca haber etti.
Körüşüv iştirakçileri malümat ve uquq qorçalayıcı faaliyetinen bağlı leyhalar çerçivesinde ilerideki işbirlik ve qarşılıqlı areketlerniñ ola bilgen yönelişlerini de muzakere ettiler.