Cuma künü, 12 aprelde QRM meneceri Tatyana Savçuk Avropa Keñeşi Delegatsıyasınıñ temsilcilerinen körüşüvde iştirak etti. Körüşüvde işğal etilgen Qırımda insan haqları bozuvlarınen bağlı vaziyet, QRM faaliyetinden bahs etilip, ileride ortaq işler haqqında qonuşıldı.
Körüşüvde iştirak etkenler:
- Kritian Urse- siyasiy meseleler ve tış munasebetler boyunca Müdir muavini;
- Katarina Nedelkoviç – insan haqları ve huquq üstünligi boyunca Baş müdirlik mesleatçısı;
- Marsel Kapi- siyasiy mesleatçı,
- Yuliya Dmitreva- vesiqa ve esabat meseleleri boyunca yardımcı;
- Mustafa Cemilev- qırımtatar halqınıñ lideri;
- Refat Çubarov- Qırımtatar Milliy Meclisiniñ reisi;
- Tatyana Savçuk- QRM kommunikatsıya meneceri.
Körüşüv Avropa Keñeşi Baş Kãtibiniñ maruzası içün malümat toplanmasına bağışlanıldı.
Ayrıca Tatyana Savçuk 2024 senesiniñ I çeriginde işğal etilgen Qırım, Zaporojye ve Herson vilãyetlerinde insan haqları bozuvlarınıñ talil neticelerini paylaştı, qırımlılarnı, qırımtatarlarnı taqip etkenlerini añlattı, siyasiy mahbüslerniñ haqları bozulğanından bahs etti.
‘OON Halqara mahkeme qararından soñra işğalcılar qırımtatarlarğa qarşı basqını sertleştirdiler. QRM işbu qarardan soñ istenilmegen teşkilãt olaraq tanıldı. Yazıq ki, bir çoq adiseler aşikãr etilmey, o da yahşı yöneliş sayılmaz’, – añlattı o.
Şundan da ğayrı, QRM eksperti ‘Mogilizatsıya’(‘Cesetberlik’) informatsıon kampaniyası haqqında tarif etti. Mezkür kampaniya çerçivesinde işğal etilgen territoriya sakinlerine seferberlikten qaçınmaq yolları kösterile ve şu esnaslarda iştirak etkenler haqqında malümat toplanıla.
Subetdeşler ileride işğal etilgen Qırım, Zaporojye ve Herson vilãyetlerinde insan haqlarınıñ bozuvlarını qayd etilmesi boyunca ortaq faaliyet haqqında laf ettiler.