16-17 noyabr künleri ‘Kiyev-Mogilãn akademiyası’ Milliy universitette ‘İstiqrarlı inkişaf- XXI asır’ mevzuda VII Halqara ilmiy-ameliy onlayn-konferentsıya keçti.
Konferentsıya teşkiliy komitetiniñ reis ortağı ve moderatorı olaraq QRM etraftaki alemni qoruv ve Qırım istiqrarlı inkişafı boyunca Ekspert Keneşiniñ eksperti, professor Yevgeniy Hlobistov iştirak etti. Şundan da ğayrı konferentsıyada QRM diger ekspertleri de iştirak ettiler: Vãçaslav Potapenko ve Svetlana Boyçenko.
Tedbirde Qırım ekonomikası, Ukraina coğrafiyasınıñ reintegratsıya imkãnları haqqında maruzalar taqdim etildi. Şundan da ğayrı, ekspertler Dnepr ve Kamenskoye şeherlerdeki istisalnıñ etraftaki mühitke tesirini de añlattılar.
Yevgeniy Hlobistov qayd etkeni kibi, QRM faaliyeti araştırma ve muzakere içün bayağı yañı mevzularnen temin etti. Ayrıca Ukraina tamır halqlarnıñ taqdirinden bahs etildi. Tedbir devamında Qırım ve Ukraina Cenübiniñ istiqrarlı inkişaf siyaseti, cenk bitken soñra Ukraina inkişafında gençlerniñ rolü kibi mevzular da köterildi.
Hatırlatamız ki, QRM rusiye işğali Qırım ekosistemasına tesir etkenini daima nezarette tuta ve ekologik meseleler Ukraina tamır halqlarına nasıl tesir etkenini de ögrene.