Bazarertesi künü, 6 martta, 2022-2023 seneleri qırımtatar tiliniñ inkişaf strategiyasını amelge keçirmek içün Hakimiyet tarafından teşkil etilgen Milliy Komissiyanıñ ilk toplaşuvı olıp keçti.
Tedbirde Qırım MC Ukraina Prezidentiniñ daimiy temsilcisi Tamila Taşeva, qırımtatar Milliy Meclis reisi Refat Çubarov, baş nazir muavini İrina Vereşçuk, tasil muessiselerniñ alimleri ve tilşınasları iştirak ettiler.
Strategiyanı amelge keçirmek içün atılacaq ilk adımlarğa yardımcı olacaq esas mevzularğa diqqat ayırıldı, şu cümleden qırımtatar tiliniñ imlãsını belgilemek ve bu meseleni çezmek içün iş gruppanı meydanğa ketirmek kibi sualler bahs etildi.
‘Qırımtatar tili- YUNESKO imayesi altında bulunğan misilsiz medeniy degerdir. Onı saqlamaq boyun-borcumızdır. Şimdi kerçek neticelerni ketire bilecek yönelişlerge diqqatımıznı ayırmalımız. Eñ evelã- imlãnı ve onı resmiy tayinlemek içün huquqiy temelini işlep çıqarmaqtır. Ukraina qırımtatar tiliniñ yoq olunmasına musaade etmez. Onıñ inkişaf etilmesi içün elimizden kelgenini yapacaqmız, Milliy Komissiya arqalı şu cümleden’,- dedi İrina Vereşçuk.
Hatırlatamız ki, QRM taqımı Ukraina tamır halqı tiliniñ saqlanılması ve inkişaf etilmesi içün elinden kelgenini yapmaqta. Misal olaraq, 2019 senesi QRM tarafından insan haqları Umumiy Deklaratsıyası qırımtatar tiline tercime etilgen edi. 2021 senesi insan haqları boyunca Avropa Konventsıyası tercime etilgen edi. 2023 senesi yanvarde QRM ve Milliy Meclis tarafından Ukraina tamır halqlarnıñ tarihiy toponimlerini tiklemege doğrultılğan ‘Adlarnı qaytarmaq- Qırımnı qaytarmaqtır’ informatsıon kampaniyasını başlatıldı.