Qural ayınıñ 7-nci, cumaaqşamı künü, Qırımtatar Resurs Merkeziniñ ofisinde Ukrayin Liderlik Akademiyasınıñ Bridges of Trust leyhasınıñ reberi Yuriy Manilovnen iş körüşüvi olıp keçti.
Körüşüvde Qırımtatar Resurs Merkeziniñ İdare reisi, Qırımtatar Milliy Meclisiniñ azası Eskender Bariyev, QRM-niñ uquqçısı Lüdmıla Korotkıh, QRM-niñ kommunikatsiya meneceri Tetâna Savçuk ve Valentına Mancula iştirak ettiler.
Körüşüvde Eskender Bariyev Qırımtatar Resurs Merkeziniñ faaliyetiniñ esas yönelişlerini taqdim etti. O, gençlernen çalışmağa, hususan bütün memleketniñ faal gençlerini birleştirgen ve Qırım meseleleri, onıñ kelecegi ve Ukrayina tamır halqlarınıñ aq-uquqları grajdanlıq añınıñ şekillenmesine yardım etken er yıllıq “Azatlıq lageri”ne ayrı diqqat ayırdı.
Bariyev QRM-niñ malümat-maarif faaliyetini, hususan teşkilâtnıñ #LiberateCrimea halqara areketiniñ faallerinen beraberlikte yaratqan materiallarını ve olarnıñ vizual şekillerini ukrayin ressamı Andriy Yermolenko azırlağanını tarif etti.
QRM-niñ uquqçısı Lüdmıla Korotkıh teşkilâtnıñ aq-uquq qorçalayıcı faaliyetini taqdim etti. O, vaqtınca işğal etilgen topraqlarda yaşağan sakinlerge QRM tarafından berilgen mesleat aqqında tarif etti. Bundan da ğayrı, o, QRM -niñ qırımtatar ve Ukrayinanıñ vaqtınca işğal etilgen topraqlarınıñ diger sakinleriniñ aqlarını qorçalavğa doğrultılğan halqara adliyecilik faaliyeti aqqında haber etti.
QRM taqımı, hususan, Ukrayina tamır halqları ve milliy azlıqları olğan memleket içinde köçken şahıslar içün azırlanğan “TurBOTa VPO” chatbotını telegramda taqdim etti. Bot, QRM qarşılaşqan uquqiy, içtimaiy ve diger meselelernen bağlı aktual malümatnı taqdim ete.
Yuriy Manilov ise, Ukrayin Liderlik Akademiyasınıñ faaliyeti, onıñ regional merkezleri ve gençler içün tasil imkânları aqqında tarif etti. O, şahsiy inkişaf, liderlik ameliyatları ve cemiyet içün müim olğan teşebbüslerde iştirak etüvnen birleştirilgen oquv formatını taqdim etti.
Toplaşuv iştirakçileri ilerideki işbirlik imkânlarına diqqat ayırdılar. Hususan, taraflar vaqtınca işğal etilgen topraqlardan gençlerni qısqa müddetli gençlik lagerlerine celp etmek ve Ukrayin Liderlik Akademiyasında 10 aylıq oquv keçüvi aqqında laf ettiler.
Taraflar Qırım, Ukrayinanıñ tamır halqları, vaqtınca işğal etilgen topraqlarda insan aq-uquqlarınıñ bozuluvı ve halqara adliye ile bağlı mevzularnıñ Ukrayin Liderlik Akademiyasınıñ tasil programmalarına integratsiyası üzerinde çalışmağa añlaştılar. Bu, hususan, gençler içün umumiy lektsiyalar, munaqaşalar ve diger maarif tedbirleriniñ keçirilmesinen bağlı.
