Çarşenbe künü, 8 fevralde qırımtatar Milliy Meclis temsilcileri Ukrainada Türkiye Cumhuriyetiniñ Fevqulade ve Vekãletli Elçisi Yağmur Ahmet Güldere ile körüştiler.
Körüşüvde Ukrainada Türkiye Cumhuriyetiniñ Fevqulade ve Vekãletli Elçisi Yağmur Ahmet Güldere, qırımtatar Milliy Meclis reisi Refat Çubarov, Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev ve meclis azası Riza Şevqiyev iştirak ettiler.
Ukrainada Türkiye Cumhuriyetiniñ elçisine Türkiyedeki zelzelelerniñ facialı neticeleri munasebetinen qayğılarını ve baş sağlıqlarını bildirdiler.
8 fevral kününe Türkiye ve Suriyede zelzeleler neticesinde ölgenlerniñ sayısı 9 biñden ziyade, yaralanğanlarnıñ sayısı 40910 ziyade oldı.