Cumaaqşamı künü, 16 fevralde, Qırımtatar Milliy Meclis ofisinde devlet tinini qoruv boyunca vekãletlisi Taras Kremen ve onıñ muavini Yuriy Zubkonen körüşüv olıp keçti.
Körüşüvde Qırımtatar Milliy Meclis reisi Refat Çubarov, Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev, halq deputatı Ahtem Çiygöz ve Meclis azası Riza Şevkiyev iştirak ettiler.
Körüşüv ketişatında Ukraina tamır halqnıñ tili olaraq qırımtatar tiliniñ meseleleri muzakere etildi. Ayrıca, QRM reisi Eskender Bariyev qayd etti ki, Ukrainada qırımtatar tiliniñ inkişafınen oğraşqan tamır halqlarnıñ til institutı yoq. Şundan da ğayrı, tamır haqllarnı qoruv boyunca vekãletli ya da onıñ muavini kibi bir maqam yoq.
‘Kergin turğan meselelerden biri- qırımtatar adlarnıñ transliteratsıyası. Yazıq ki, qırımtatar adlarnıñ ukrain tilinde yazılma qaideleri tam belgilenmegen, şu sebepten de vesiqalarda adlar yañlış yazıla’,- añlattı o.
Taras Kremenni QRM ve Qırımtatar Milliy Meclisi Qırımnıñ eski adlarınıñ qaytarılmasına doğrultılğan ‘Adlarnı qaytarmaq-Qırımnı qaytarmaqtır’ adlı informatsıon kampaniyasını başlağanları haqqında haberdar ettiler.
‘Bu aqta laf etmek kerek, Qırımda tarihiy adlarnıñ yoq etilmesi lingvotsıd unsurı sayıla’,- qayd etti Bariyev.
Taraflar tamır halqnıñ advokatsıyası ve inkişafı boyunca beraberlikte tedbirler keçirmek kerekligi haqqında añlaştılar. Ayrıca, Ana tili kününe beraberlikte matbuat konferentsıya keçirilmesi ve ukrain ve qırımtatar tilleriniñ inkişaf meselelerini belgilenmesi muzakere etildi.