rusiye akimiyetinen qanunsız maküm etilgen Qırım siyasiy mabüsi Arsen Abhayirov Tsivilsk şeerinde (Çuvaşiya Cumhuriyeti) İK-9 koloniyasında ceza müddetini keçirgende sağlığı bozulğanı aqqında haber ete. Bu aqqında kiçik aynıñ soñunda – saban ayınıñ başında keçirilgen uzun bir körüşüvden soñ «Qırım birdemligi»ne apayı Azize Abhayirova haber etti.
Siyasiy mabüsniñ apayınıñ aytqanına köre, erkek çoqtan berli varikoz damarları hastalığından tedaviylev muhtac, lâkin bu meselesi daa çezilmegen. 2023 senesiniñ qural ayında o, tibbiy yardım kerekligi aqqında haber etti. Onıñ sağlığı, hususan, Yeniseyskteki (Krasnoyarsk vilâyeti.) müessisede bulunğan vaqıtta bozuldı, anda qattı rejim sebebinden saba altıdan aqşam onğace ayaq üstünde turmağa mecbur ola edi.
Keçken yılnıñ ilk yaz ayında İK-9-ğa avuştırılğan soñ, Abhayirovnıñ ayaqlarını UZİ etildi, lâkin teşkerüvniñ neticeleri oña berilmedi. Apayına kopiyasını yollamaq ricasına baqmadan, koloniya idaresi cevap bermedi.
«Başqa tevsiye bermediler, operatsiya aqqında laf etmediler», – Azize Abhayirova dedi.
Bundan ğayrı, siyasiy mabüs baş ağırğanından, bel ağırğanından, qan basımınıñ keskin tüşkeninden şikâyetlene. Tibbiy bölükke barğanda, oña tek esas ağrı kesüvciler, şu cümleden paratsetamolnı bereler. O, körüvniñ zayıflaşqanını da bildirdi, oquğanda ise, metinniñ buzulğanını köre.
Belli ki, Arsen Abhayirov işhanede er kün, aftada altı kün çalışa. Koloniya qattı rejim müessisesi olğanına baqmadan, o umumiy şaraitlerde tutula, onıñ dört ayda bir kere berilüvler almağa ve qorantasını körmege imkânı bar.
Apayınıñ aytqanına köre, o, intizamiy cevapkârlıqqa çekilmegen, o, tutmaqnıñ belgilengen qaidelerine riayet ete.
Koloniyada ratsion sıñırlı – mabüslerni ekseriyetle balıq ve qartopnen besleyler, suvnıñ keyfiyeti de zayıf.