Qırım ressamı ve siyasiy mabüsi Boğdan Ziza Yekaterinburgğa etap etildi, şimdi o, 1-nci SİZO-da buluna. Onıñ nevbetteki avuştırılmasınıñ soñki noqtası alâ daa belli degil. Siyasiy mabüsniñ qardaşı Oleksandra Barkova Instagramdaki destek saifesinde bildirdi.
Onıñ aytqanına köre, etap marşrutı Vladimir, Nıjniy Novgorod, Kirov, Perm ve Yekaterinburgdan keçti. Ressam yañıdan yolğa çıqmadan evel 1-nci SİZOda on kün qala bilir.
Boğdan Ziza tuvğanlarına yazğan mektübinde mayısnıñ 30-nda “Vladimir merkezi” apishanesinden çıqqanını tarif etti.
«Meni trenge – aynı Stolıpin vagonına – diger «eki yüz beşinciler» ile beraber bir vagonğa mindirdiler, ve böyle bir şekilde men yañı etapqa yol aldım. Kelecekte yañı bir şey bekley ve, büyük ihtimalnen, bu daa bir sınav olacaq”, – dep siyasiy mabüs yazdı.
Etap vaqtında, uzun müddet devamında ilk sefer Ziza, apishane divarlarından tış tabiatnı kördi. Зencereden körüngen manzaralar, yıllar devamında izolâtsiyada bulunğan soñ, onıñ içün müim maneviy destek oldı – o qayd etti.
Bundan da ğayrı, ressam azatlıq aqqında fikirlerinen paylaşa ve apiske alınğanına baqmadan kelecekke inanğanını ayta.
«Azatlıqnıñ ne qadar yaqın ve aynı zamanda uzaq olğanını tekrar-tekrar tüşünmek mümkün degil. İçimde bir şey sıqışıp tura, lâkin tezden keçe, çünki eyimserlik – sağlam, doğru eyimserlik – aqılnı hayal kibi degil, plan kibi arzu etilgen şeyler aqqında tüşüncelernen toldura», – dep Qırım siyasiy mabüsi qayd etti.
Bundan da ğayrı, etap vaqtında o, kitaplar, elyazmalar, fotoresimler ve qol tutucı mektüplernen beraber, eki yıldan ziyade saqlanğan şahsiy eşyalarını aldı.
Hatırlatamız: 2023 senesi ilk yaz ayınıñ 6-nda Rostov-na-Donudaki Cenübiy bölgesi makemesi, 2022 senesi mayıs ayında Kezlevde tutulğan Boğdan Zizağa «terrorizm ve kütleviy haber vastaları ve İnternet ağını qullanıp, terroristik faaliyetke açıq çağıruvlar»da qabaatlap, qarar berdi. O, umumiy rejimli müstemlekede 15 yıl ve ilk 4 yılını apishanede keçirmeli.