Qırım siyasiy mabüs, “Qırım birdemligi” cemaat birleşmesiniñ koordinatorı Server Mustafayev qural ayınıñ 5-nde qanunsız apis cezasında 39 yaşını toldurdı.
Qırımtatar Resurs Merkeziniñ hadimleri Server Mustafayevniñ doğğan kününen hayırlap, oña tezce azat etilmesini, qorantasınen birleşmesini, sağ-selâmetini, sabırlılığını, ruhunı bozulmağan quvetini ve amanlığını tileler.
Allah baht, sabır ve sağlıq bersin!
Server Mustafayev de-fakt olaraq sert izolâtsiya şaraitinde zoraki buluna: uydurılğan sebeplerden onı uzun müddetke sert şaraitli barakqa (SUS) ve kamera tipli odağa (PKT) yerleştirdiler – Qırımtatar Resurs Merkezi qayd ete.
Bu vaqıt devamında Serverniñ sağlıq vaziyeti bayağı fenalaştı: belkemik meseleleri arttı, boyun ağrıları ve sıq baş ağrıları bar.
Hatırlatamız: 2018 senesiniñ qural ayınıñ 21-nde işğal etilgen Qırımda rusiye quvetçileri “Qırım birdemligi” faalleriniñ evlerinde tintüvler keçirip, Server Mustafayevni yaqaladılar. O Ukrayinada ve dünyanıñ çoqusı memleketlerinde degil, tek rusiyede yasaq etilgen “Hizb ut-Tahrir” teşkilâtında iştirak etkeninde qabaatlandı.
2020 senesi ilk küz ayınıñ 16-nda Rostov-na-Donudaki Cenübiy bölgesiniñ arbiy makemesi Mustafayevni Bağçasaraynıñ ekinci “Hizb ut-Tahrir davası” çerçivesinde 14 yıl sert rejimli koloniyada qapaluvına üküm etti.