‘Qırım rusiyeliler içün balaban bir ‘qazanğa’ çevirilecek’- Bariyev

December 27, 2022

Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev  Apostrof TV efirinde  UHK Qırımnı nasıl azat eteceklerini añlattı.

‘ Qırımğa qaradan ketken yolnı qapatmaq kerek. O şimdi, tam olmasa da, açıqtır. Böyle etip, yarımada tabiy bir ‘qazanğa’ çevirilecek ve Qırımnı tez vaqıtta, atta qansız azat etmege mümkün olacaq,’- dedi o.

Bariyevniñ aytqanına köre, şimdi Qırımnıñ şimal taraflarında ve vaqtınca işğal etilgen Geniçesk rayonında rusiyeliler orlar qazalar. Şundan da ğayrı, Şimal-Qırım kanalında suv seviyesi eksiltildi. Evelden qışta her vaqıt öyle yapa ediler, amma şimdi suv pek az qaldırıldı. Belki kanal yatağını saqlanmaq içün qullanacaqlar.

‘Şundan da ğayrı, Canköy ve Tarhanlar(Pobednoye) köyler arasında köpür qapatıldı. Bu köyde aerodrom yerleşe, işğalcılar da adamlar anda barıp, körip, Ukraina Harbiy Küçlerine haber yetkizgenlerini istemeyler. Hem de Qırım şarqındaki Keriç-Canköy yolunı faal işletkenleri belli. Faqat şimdi yollarını deñiştirip, öz harbiy tehnikalarını Qalay köyüne alıp ketireler’,- dedi ekspert.