Çarşenbe künü, 31 iyülde QRM reisi qırımtatar Milliy Meclis azası Eskender Bariyev Kremençug litseyiniñ müdir muavini Oksana Propastinanen körüşti.
Oksana talebesi Sofiya Yermakovanen birlikte Küçük ilimler akademiyasında ‘Qırımtatar gumanitaristika’ mevzusıda ilmiy iş yazalar. Araştırmaları çerçivesinde malümat içün QRM-ne muracaat ettiler.
Eskender Bariyev öz nevbetinde QRM-niñ çeşit saalarda faaliyeti aqqında tarif etti: Ukraina tamır halqlar haqlarınıñ, medeniy mirası, tili, menliginiñ qorçalanması. Şundan da ğayrı, o, Ukrainada advokatsıon faaliyet ve halqara teşkilãtlarnen işbirlik aqqında añlattı.
Öz tarafından QRM Kremençug litseyine Natalya Belitserniñ ‘Qırımtatarlar tamır halq olaraq’ serlevalı kitap ve teşkilãt tarafından işlep çıqarığan malümatlarnı: ‘Qırımtatar tarihiy adlarını bulundırğan Qırım haritası’ eksklüziv pazzlarnı, ‘2020 senesi işğal etilgen Qırımdaki vaziyetniñ talili’, qırımtatar tiline tercime etilgen ‘İnsan haqları ve esas serbestliklerniñ qoruvı aqqında Konventsıya’, ‘ İnsan haqları umumiy deklaratsıyası’ ve ‘Qırım kelecegi: huquqiy teminlev ve tevsiyeler’ kibi vesiqalarnı teslim etti.
‘Qırım meselelerinen meşğul olğan talebelernen iş tutmaq emiyetlidir. Qırım ve tamır halqalr meselesinde teren bilgi sahiplerine ihtiyacımız bar. Biz de öz tarafımızdan böyle talebeler bilgilerni aqiqiy menbalardan ögrengenlerini temin etermiz’,- qayd etti Bariyev.