İyünniñ 30-nda Ukraiyna buhran media-merkezinde keçirilgen “İşğal şaraitinde Qırım qadınları: basqılar ve küreş” matbuat konferentsiyasınıñ spikerlerinden biri Kremlniñ sabıq arbiyolmağan esiri Leniye Umerova oldı. O, qanunsız apis etilgeniniñ öz ikâyesini paylaştı ve rusiye esirliginde qadınlar qarşılaşqan qıyınlıqlar aqqında tarif etti.
Leniye Umerova, 2022 senesi orta küz ayında, vaqtınca işğal etilgen Qırımdaki tuvğanlarına gumanitar maqsatnen barmağa tırışqanda, rusiye quvetçileri tarafından hırsızlanğanını ikâye etti. Qırımda doğıp öskenine baqmadan, onıñ rusiye pasportı yoq edi.
“Hırsızlanuvdan soñ tahminen yedi-sekiz saat devamında sorğuğa çekildim, soñra ise küç qullanıp makeme oturışuvına ketirildim, makeme ise saba saat beşte olıp keçti. Meni, tamamen uydurılğan qabaatlavlar esasında, memuriy bozuvda qabaatladılar ve apishanege yerleştirdiler, anda üç ayğa qaldım”, – dep tarif etti.
Bundan soñ onı, uquqçınen bağını zorlaştırmaq ve tış dünyadan izolâtsiya etmek içün, apishanelerniñ farqlı yerleri arasında alıp ketmege başladılar. Yaqalanğanından yarım yıl keçken soñ, oña “casuslıq”ta qabaatlavlar qoydılar, lâkin azat etilgende bile makeme üküm çıqarmadı, Umerova qayd etti.
“Meni bu vaziyette tutqan esas şey, içimdeki inanç, kim olğanımnı, qıymetlerimniñ ne olğanını bilmek, ve şu vaziyette olğanımnı añlamaq, – men birinci degilim, soñki degilim. O qadar adam buña dayandı, ve şimdi menim bozulmağa aqqım yoq”, – dep qayd etti o.
Umerova, qanunsız sürgün etilgen Ukraiynlerge cemaat desteginiñ ve halqara diqqatınıñ müimligini qayd etti.
Yarım yıldan soñra, içtimaiy teşkilâtlar ve kütleviy haber vastaları menim ikâyemni cemiyet alanına çıqarmağa başlağanda, maña mektüpler kelmege başladı. Faalciler ve diger merametli insanlar maña mektüpler yollamağa başladılar. Ve tam izolâtsiya vaqtında mektüplerni alacaqsıñız ve aqıldan tüşken adam olmağanıñıznı añlaycaqsıñız, o qadar da fena degil, ve siz alâ daa dayana bilesiñiz”, – spiker dep qayd etti.
rusiye esirliginde bulunğan qadınlarğa qol tutuv aqqında aytqanda, olar unutılmasın dep, Umerova qayd etti.
Olar aqqında er vaqıt aytmaq kerek, olarnı em global leyhalar vastasınen, em de er bir adise hatırlatmaq kerek. Esir alınğan qadınlarnıñ qorantalarına da yardım etmek kerek, çünki olar kerçekten de telükesiz aldalar ve em ruhiy, em de maddiy yardımğa muhtaclar. Rehabilitatsiya mehanizmlerini endi qurmaq kerek, çünki erte ya da keç bu qadınlar evlerine qaytacaq”, – Leniye Umerova dep yekünledi.