Qırımtatar Resurs Merkeziniñ idare reisi, Qırımtatar Milliy Meclisiniñ azası Eskender Bariyev Birleşken Milletler Teşkilâtınıñ tamır halqları meseleleri Daimiy forumınıñ 25-inci sessiyasında “Zıddiyet şaraitlerinde tamır halqlarnıñ aqlarını temin etüv” panel munaqaşasında qırımtatar halqınıñ temsiliy institutları, olarnıñ uquqiy statusı ve Ukrayinada siyasiy emiyeti ve Qırım işğali şaraitinde muzakere etildi.
“Men Qırımtatar Milliy Meclisiniñ – Qırımnıñ tamır halqı temsil organınıñ azasım. Meclis – Qurultay tarafından saylanğan qırımtatar halqınıñ yekâne vekâletli temsiliy-icra organıdır. sovet birligi tarafından qırımtatar halqına qarşı yapılğan genotsidniñ aqibetlerini yoq etmektir – Meclisniñ esas maqsadı.
Onıñ qayd etkenine köre, Meclisniñ faaliyeti rusiye federatsiyası tarafından yasaq etildi, bu ise tamır halqınıñ kollektiv aq-uquqlarınıñ bozuluvına işaret ete:
“2016 senesiniñ ilk küz ayınıñ 29-ncı künü rusiye yuqarı makemesiniñ qararına köre, Meclis ekstremist teşkilât olaraq ilân etildi ve yasaq etildi, böyleliknen qırımtatarlarnıñ temsil institutlarını idare etmek kollektiv aqqı bozuldı. rusiye Meclisni yasaqladı, çünki onıñ qararına köre, qırımtatarlar işğal etilgen Qırımda qanunsız referendum ve saylavlarnı körmemezlikke urdı. FSB Meclis azalarına qarşı muntazam sürette basqılarnı keçire.”
Bariyev, Ukrayinanıñ Meclis statusına ve onıñ institutsional tanılmasına yanaşuvınıñ deñişkenini qayd etti:
“2014 senesi Ukrayina Yuqarı Şurasınıñ qararı ile qırımtatar halqı Ukrayinanıñ tamır halqı ve Meclis onıñ temsiliy organı olaraq tanıldı. 2021 senesi “Ukrayina tamır halqları” aqqında qanun qabul etildi. 2026 senesiniñ çiçek ayınıñ 3-nci künü, Ukraina ükümeti qararınen, Qırımtatar Milliy Meclisi tamır halqnıñ temsiliy organınıñ uquqiy statusını aldı.”
Neticelep, bu qararnıñ qırımtatar halqınıñ siyasiy ve uquqiy şahsiyeti içün emiyetini qayd etti:
“Ukrayinada ilk sefer Qırımtatar Milliy Meclisi em siyasiy, em de uquqiy subyekti oldı. Qanunğa binaen, Meclis şimdi Ukrayina bücetinden para ala bile, Qırım ve tamır halqlarnen bağlı bütün meseleler ise onıñnen uyğunlaştırılmalı. “Ukrayina olmadan, Ukrayina aqqında iç bir şey olmaz”, “Ukrayina ve qırımtatar olmadan, Qırım aqqında iç bir şey olmaz” printsipleri, bütün memleketler ve halqara teşkilâtlar tarafından Ukrainada adaletli barışıqnıñ temin etilmesinde qabul etilecek, buna eminim. Qırımtatar Milliy Meclisi bu davalarnıñ subyekti olacaqtır.”