Qırımtatar Resurs Merkeziniñ İdare Reisi, Qırımtatar Milliy Meclisiniñ azası Eskender Bariyev FREEDOM telekanalına bergen intervyüsında sürgünlik yerlerinde yaşayışnıñ şahsiy tecribesi, qırımtatar halqınıñ tarihiy adalet tiklenmesi içün küreşi ve 1944 senesi sürgünliginiñ genotsid olaraq halqara seviyede tanılması kerekligi aqqında tarif etti.
Bariyevniñ aytqanına köre, sürgünlik mevzusı onıñ içün tek zenaat ya da cemiyet meselesi degil, şahsiy bir ikâyedir.
“Birinciden, men sürgünlik yerlerinde doğdım, ve balalıqtan berli añlay edim… maña da areketler yapıldı, çünki Sovetler Birliginiñ malümat siyaseti, propagandistik siyaseti… Mekteplerde bizge Qırımda bir vaqıtları qırımtatarlar yaşağanını ayttılar, amma böyle bir halq yoq. Bundan da ğayrı, Sovetler Birligi, Kommunist firqası yañlışıp olamay, dep ayta ediler, demek, “doğru yapqanlar”, – Bariyev dedi.
Qırımtatar Resurs Merkezi qırımtatar halqınıñ sürgünligi ve Qırım işğali arfesindeki vaqialar bir cinaiy esnasnıñ qısmı olğanını qanuniy isbatlamaq içün muntazam sürette çalışa – o qayd etti.
Biz, Qırımtatar Resurs Merkezi olaraq, qırımtatar halqınıñ sürgünligi ve 45 yıl devamında sürgünlik yerlerinde bulunması – genotsid olğanını añlatqan uquqiy tasnifeni azırladıq. 2014 senesi Qırımnıñ işğali “genotsid siyasetiniñ devamıdır”, – dep qayd etti.
Genotsid tanılması içün küreş nesiller devamında devam ete ve bugünki iş milliy areketniñ devamıdır – QRM-niñ İdare Reisi qayd etti.
“Men milliy areket faalleriniñ qorantasında doğdım, ve balalıqtan toplağanımıznı, muracaat kampaniyaları keçirgenimizni, qırımtatarlarnıñ sayısı, elâk olğanlar aqqında malümat toplağanımıznı hatırlayım. Bunıñ episi öz-özüni cedvelge aluv ve içtimaiy öz-özüni teşkil etüv vastasınen etile edi”, – Bariyev dep ayttı.
Onıñ aytqanına köre, bugün Ukrayina ve halqara ortaqları bu cinayetniñ halqara tanılması meselesinde yavaş-yavaş ilerileyler.
“Bugün, Ukrayinadan ğayrı, daa sekiz memleket qırımtatarlarnıñ sürgünligini genotsid olaraq, işğalni ise genotsid siyasetiniñ devamı olaraq tanıdı. pek yahşı ki, , bu ceryan devam ete” –qayd etti.
Ayrıca, Bariyev QRM qırımtatar halqınıñ genotsidine dair cinaiy dava çerçivesinde etken işini hatırlattı.
“2016 senesi biz bu esnasqa faal şekilde yardım ettik, Qırımdan qartlarnı, tahqiqatçığa şaatlıq etken sürgünlik şaatlarını ketirdik. Olardan çoqusı endi vefat etti, amma şaatlıqları qayd etildi ve protsessual ceetten delil olaraq qala”, – dep qayd etti.
Keçmişte yapılğan cinayetlerge kerekli uquqiy qıymet kesilmese, olar tekrarlanalar – soñunda Eskender Bariyev qayd etti.
Şunıñ içün biz em ukrayin cemiyetini, em de halqara cemiyetni haberdar etmek kerekmiz. Çünki bugün rusiye bütün ukrayin halqına nisbeten yapqan areketleri de genotsid siyasetiniñ devamıdır. Tünevin takbih etilmedi – bugün tekrarlana”, – QRM-niñ İdare Reisi dep yekünledi.