Qırım işğaliniñ 9 yıllığı ve rusiye-ukrain cenkiniñ 1 yıllığı munasebetinen QRM ‘O vaqıt küreştik, şimdi yeñecekmiz’ adlı videorolikni taqdim ete. Rolikte 2014 senesi olğan vaqialar, yarımadaki ukraintaraflı sakinlerge qarşı repressiyalar, rf-nıñ Ukrainağa qarşı başlatqan cenki haqqında qısqadan añlatıla.
Doquz yıl evel, 2014 senesi 26 fevral künü on biñlernen qırımtatar, ukrain ve Qırımda yaşağan diger millet vekilleri qırımtatar Milliy Meclisiniñ daveti ile Qırım Muhtar Cumhuriyetiniñ Yuqarı Şurası binasınıñ yañına kelip, rusiyetaraflı deputatlarğa Qırımnı Ukrainadan ayırğan, anayasağa qarşı kelgen qararlarnı qabul etmege imkãn bermediler.
Şu künü Qırım cemaatçılığı barışıq, qanun yolunen Ukrainanıñ territorial bütünligini qorçaladı, rusiye ve onıñ Qırımdaki casuslarına nevbetten tış sesiyanı keçirmege ve Qırımnı Rusiyege ‘göñülli olaraq’ qoşulmasına yol bermedi. Qırımnıñ tamır halqı-qırımtatarlar, Ukraina devletine sadıq qalğan yüzlernen ukrain ve diger millet vekilleri Rusiyeniñ esirinde qalmaqta.
QRM tarafından hazırlanğan rolik 2014 senesiniñ vaqiaları, Qırımnıñ işğali, qırımtatar halqı ve yarımadadaki ukriantaraflı ealige qarşı repressiyalar haqqında añlata. Kütleviy şekilde tintüvler, tutuqlamalar, mahkemeler, Rusiyeni qabul etmegen sakinlerge qarşı qorquzma aleti olaraq işletile.
Yazıq ki, RF Qırım ve Donbasnıñ işğalinen toqtamadı. 2022 senesi 24 fevral künü Rusiye Ukrainağa qarşı cenk başladı. RF yañı işğal etilgen territoriyalarda da ukrainlerni taqip etmege ve qorquzmağa devam etti. Al-azırda da bütün Ukraina raketalarnıñ darbeleri altında bulunmaqta.
Bu rolikniñ sayesinde bütün halqara cemaatçılıqnıñ rusiye hakimiyetiniñ cinayetlerine diqqatını cekmege, ukrain ealisine ise o vaqıt, yani 2014 senesi- Rusiye Qırımnı işğal etkende, biz küreşkenimizni ve şimdi yeñecegimizni hatırlatmağa isteymiz!