Qırımtatar Resurs Merkeziniñ İdare Reisi, Qırımtatar Milliy Meclisiniñ azası Eskender Bariyev 5-inci kanal efirinde vaqtınca işğal etilgen Qırım içün logistika bozulmasınıñ aqibetleri aqqında tarif etti.
Onıñ aytqanına köre, rusiyeniñ işğal etilgen yarımadanı temin etmek içün qullanğan esas naqliyat yollarına ücüm endi tek arbiy logistikağa degil de, regionnıñ grajdan yaşayışı ve iqtisadiyatına da tesir ete.
İşğal etilgen yarımadanıñ turistik saası da bu buhran aqibetlerini kördi. Qırımğa barmaqqından vazgeçken ruslarnıñ sayısı arta. Turoperatorlarnıñ malümatına köre, müşterilerniñ aman-aman yarısı satın alınğan biletlerini teslim etmege başladı, şifahane ve pansionatlarda ayırtuv seviyesi ise 30 fayızğa eksildi, dep bildirdi Bariyev.
İşğal akimiyeti yıllardır rusiyeniñ baş kurortı olaraq köstermege tırışqan region içün bu kibi tendentsiya ciddiy bir iqtisadiy darbe ola.
Hatırlatamız: soñki vaqıtları ukrayin arbiyleri Qırımda işğalci quvetlerni temin etmek içün qullanılğan logistika obyektlerine bir sıra darbeler endirdi. Çonğar ve Armânsk köprüleri, ponton keçitleri, demiryol infrastrukturası ve keçiş noqtaları zarar kördiler. Bu darbelerniñ aqibetleri endi em arbiy logistika saalarında, em de işğal etilgen yarımadanıñ grajdan sektorında is etile.