Qırımtatar Resurs Merkeziniñ İdare reisi ve Qırımtatar Milliy Meclisiniñ azası Eskender Bariyev BMTniñ tamır halqlar daimiy forumınıñ 25-nci sessiyasında Ukrayina tamır halqlarınıñ devletlerara basqığa qarşı köntekstindeki vaziyeti aqqında beyanat etti, hususan, o, qırımtatar halqına qarşı yapılğan basqılarğa ve Qırımnıñ rus işğali altında qadın-qızlarnıñ vaziyetine diqqat çekti.
Eskender Bariyev qırımtatar halqı, 1783 senesi Rusiye tarafından Qırım ilhağından soñ, alıp barılğan maqsatlı genotsid siyasetiniñ neticesinde öz Vatanında azlıqqa tüşkenini qayd etti.
«Daa, 2014 senesi Qırımnıñ işğal etilüvi Beyannameniñ 1, 3, 7-nci maddelerini bozuv oldı», — dep qayd etti.
Ayrıca, QRM idaresiniñ reisi 39-ncı Tevsiyeniñ ömürge keçirilmesinde yeterli ilerilev olmağanına diqqat çekti.
«Yazıq ki, 39-ncı tevsiyeniñ ömürge keçirilmesinde ilerilevler soñ derece sıñırlı qalmaqta, hususan rusiyeniñ Qırımnı işğal etüvi köntekstinde, qayd etmege mecbur olam », — dedi Eskender Bariyev.
O, öz çıqışında, siyasiy taqip aqqında şimdiki malümatnı berdi.
“Bugünki zamanda FSB apishanelerinde 351 adam tutulmaqta; olardan 180 tamır qırımtatar halqınıñ vekilleridir. Olarnıñ arasında 54 qadın bar, bu cümleden 10 qart qadın (eñ büyügi 71 yaşında) ve 13 yaş qız bar. Olardan eñ kiçigi Nasiba Saidova, o tek 19 yaşında, ve yaqında evlendi, — dedi o.
Eskender Bariyevniñ aytqanına köre, bu işğalci akimiyetniñ tamır halq qadınlarınıñ reproduktiv sağlığına tesir etmesiniñ misalidir.
«Bu qadınlar «devlet satqınlıq», «casuslıq» ve terrorizmde qabaatlandılar», — dep qoştı.
Eskender Bariyev halqara cemiyetni de devletlerara çatışuv köntekstinde tamır halq qadınlarınıñ taqdirine daa çoq diqqat ayırmağa, bütün siyasiy mabüslerniñ azat etilmesine yardım etmege, insan aqları qorçalayıcıları ve faalcilerniñ taqipten qorçalanuvını temin etmege, tamır halq qadınlarınıñ siyasiy ceryanı ve cemaat iştirakini kenişletmek teşebbüslerini yardım etmege ve tamır halqlarnıñ aqlarını ömürge keçirüvniñ bütün mehanizmlerine gender perspektivasını qoşmağa çağırdı.
“39-ncı Tevsiyeniñ ömürge keçirilmesi qadınlarnıñ aqiqiy, havfsız ve musaviy iştiragisiz mümkünolmağan.Tamır halqlar içün bu adalet, lâyıqlıq ve turğun kelecek meselesidir”, – dep, öz fikirini yekünledi.