Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev ‘Gromadske radio’ radiosına intervyu bergende QRM faaliyeti haqqında añlattı.
‘2022 senesi 24 fevralden soñra işğal etilgen Qırımda yüz bergen insan haqlarınıñ bozuvlarını qayd etmek kerekligine qarar berdik. Şunda da ğayrı, aynı faaliyetni yañı işğal etilgen Herson, Zaporojye vilãyetlerinde keçiremiz. Rusiye işğalcılarnıñ cinayetlerini qayd etip, halqara cemiyetine haber etemiz,’- dedi Bariyev.
QRM ekspertleri halqara cemiyetini birden haberdar ete, BMT(OON) İŞ grupasına zorbalıqlı qaçıruv haqqında bilgilerni eñ tez vaqıtta teslim ete. Qaçıruvdan soñ bir qaç kün keçmeden adamlar tapılğanı, ya da azat etilgen zamanları az degil. Ya da qaçırılğannıñ bulunğan yeri birden belgilene.
Rusiyeniñ yañı territoriyalarnı zapt etmege istegine baqmadan, işğal etilgen Qırımnı unutmamalı.
‘«LIBERATECRIMEA» informatsıon kampanyasını hakimiyetke küreşimizni soñuna qadar alıp barmaq kerekligini hatırlatmaq niyetinen işlep çıqardıq. İşğalcılarnıñ maqsadı- Ukrainanı yoq etmek. Farqlı etnik grupplarnıñ ve din temsilcilerini birleştirip, işğalcığa qarşı küreşkenimizni bütün dünyağa numayış etmelimiz’,- qoştı o.