Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev ATR telekanalına intervyu bergende, Nariman Ametovnıñ işkence haqqında beyanatını izaatlay eken, bular RF içün has areketler olğanını qayd etti.
2021 senesi 17 dekabr künü, Eski Qırım şeherinde rusiye silãhlı küçler qırımtatar Nariman Ametovnıñ evinde tintüv keçirdiler. Erkekni diversyada qabaatlaylar. İşğalcılar onı patlavda iştirak etkeninde emin ediler. Faqat soñra Nariman serbest qaldırıldı. Belli olğanı kibi, erkekni elektrik toknen işkencege oğrattılar.
‘Yazıq ki, bu kibi vaqialar ilk ve soñ defa degil. QRM eñ azdan 15 kere işkence vaqialarını qayd etti. Bu kibi areketler olarğa hastır’,- dedi Bariyev.
QRM malümatlarına binaen, Raim Ayvazov, Ervin İbragimov, Renat Paralamov, Vladislav Yesipenko, Server Rasilçak, Aleksandr Steşenko, Ahtem Mustafayev, Yevgeniy Panov, Aleksey Şestakoviç, Remzi Bekirov, Osman Arifmemetov, Vladlen Abdulkadırov, Abdulla İbragimov, Fahri Muratov, Nabi Rahimov işkencege oğratılğan ediler.
İşğalcılar qurşunğa tizmek, öldürüvnen qorquza, toknen ura, paketlernen boğa, başlarına çuval kirsete ve atta bir defa öldürgenleri bellidir.
‘Ne yapmalı? Şubesiz, böyle kibi vaqialar bütün dünyağa aşikãr etmeli. Advokatlar çalışmaq ve arizalar yollamaq kerekler. RF-nda bile bu kibi areketler qanunsızdır. OONda işkencelerge qarşı komitetke arizalar yollanmalı’,- añlattı ekspert.