Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev ‘Qırım.Aqiqat’ portalına intervyu bergende, qırımlılarnı oktãbrniñ 15- noyabrniñ 14-üne qadar keçirilecek RF ealini cedvelge aluvda iştirak etmemege çağırdı.
‘Asılında, ealini cedvelge aluv muhim bir şey, amma Qırımda onı nasıl keçireceklerine dair şübhelerimiz bar. Birinciden, çeşit ain-oyunlarnıñ bir usulı olaraq işletile bilir. Demograflarnıñ aytqanlarına köre, eali öz millet mensüpligini bulunğan devletke köre saylamaq kerek. Bu cedvelge aluvda da öyle ola bilir ve böyleleliknen, ukrain ve qırımtatarlarnıñ sayısı olğanından azca çıqa bilir’,- qayd etti o.
Bariyev aytqanı kibi, Ukrainanıñ maqsadı- halqara cemaatçılıqnı Kreml areketlerinden haberdar etmek. Ekspertniñ qayd etkenine köre, devletimiz ealini cedvelge aluvğa tesir etemez, amma doğru ve tolu olmağan neticeler olmaması içün vatandaşlarımıznı cedvelge aluvda iştirak etmemege çağırmaq mümkün.