Qırımtatar Resurs Merkeziniñ İdare Reisi, Qırımtatar Milliy Meclisiniñ azası Eskender Bariyev, ilk yaz ayınıñ 26-nda işğal etilgen Qırım ve Aqyar territoriyasında işğalci havfsızlıqnıñ ilân etken regional hususiyetli fevqulâde vaziyet rejiminiñ ilân etilmesini izaatladı.
Onıñ qayd etkenine köre, resmiy olaraq bunı “iqtisadiy meselelerni çezmek” ve “eali ayatınıñ bütün saalarınıñ stabil çalışmasını temin etmek” kerekliginen añlatalar.
Uquq qorçalayıcınıñ aytqanına köre, bunı bürokratik tilden añlayışlı tilge tercime etseñiz, işğalci memuriyetke qoşma akimiyet berile:
– insan ve naqliyat areketini sıñırlamaq;
– işhanelerniñ mahsus iş rejimini kirsetmek;
– mülk, naqliyat ve resurslarnı tez qullanmaq;
– yedek fondlarından paralarnı kerekli protseduralarsız masraf etmek;
– er bir iqtisadiy meselelerni “fors-majornen” añlatmaq.
“Stabil işlevini” temin etmek kerekligi mevzusı pek meraqlı olğanını QRM-niñ İdare Reisi qayd etti. Soñki vaqıtqa qadar rusiye propagandası işğal etilgen Qırımda “stabillik”, “telükesizlik” ve “eñ yahşı kurort” bar olğanını ikâye etken edi. Şimdi bu “stabillik” içün fevqulâde vaziyet rejimi kerek olsa, doğrusı sual peyda ola: on yıldan ziyade rusiye seyircisine kösterilgen resimnen ne oldı?
Bariyevniñ aytqanına köre, soñki aftalar körünip tura: işğalcilerniñ arbiy logistikaları daa ziyade basqığa oğray, energetik ve naqliyat infrastrukturasınen meseleler peyda ola, işğalci memuriyet ise buhran idaresine keçmege mecbur.
“Fevqulâde vaziyet rejiminiñ ilân etilmesi – küç kösterüv degil. İşğal akimiyetiniñ telüke ve kerginlik şaraitinde çalışmağa azırlanğanını köstergen bir işaret.
Tarih defalarca isbatladı: iç bir işğalci rejim ebediy degildir. Yıllar devamında “tam kontrol” aqqında aytqan akimiyet, fevqulâde vaziyet rejiminde topraqnı idare etmege başlağanda, bu bir kerçekni köstere, o, yaratqan mifni boza, uquq qorçalayıcı dep qayd etti.