Lvivde belgisiz şahıs “Cenübiy” ticaret merkeziniñ territoriyasında camini tutandırmağa tırıştı. Tez cevap berüv neticesinde yanğınlar toqtatıldı, zarar körgenler yoq. Bu aqqında Qırım Musulmanlarınıñ Diniy İdaresi bildire.
Qayd etilgenine köre, musulman cemiyeti bu vaqianı vandallıq ve müminlerni qorqutmağa, duşmanlıq doğurmaq ve cemiyet içinde vaziyetni kerginleştirmek içün yapılğan provokatsiya olaraq tanıy.
Cenk şaraitinde öyle areketler ukrayin cemiyetini bölmek ve Ukrayinanı halqara alanda itibardan tüşürmek maqsadınen yapılğan stsenariylerniñ bir qısmı ola bile – muracaatta şunı da qayd etile.
Musulman cemiyeti müminlerni tınçlıq saqlamağa, provokatsiyalarğa yol bermemege ve qanun çerçivesinde areket etmege çağırdı. Cemaat vekilleri uquq qoruyıcı organlarına muracaat etip, tam taqiqat keçirilmesini ve cinayetnen alâqası olğanlarnı belgilemege talap ettiler.
Qırımtatar Resurs Merkezi diniy dayanmamazlıqnıñ er angi numayışlarını takbih ete ve diniy binalarğa ücümler qabul etilmeycegini ve cenk şaraitinde ukrayin cemiyetiniñ stabilsizleşüvini ve duşmanlıqnı qozğamaq içün qullanıla bilecegini qayd ete.
QRM uquq qoruyıcı organlarını adiseniñ allarını tez ve adaletli şekilde taqiq etmege ve qabaatlılarnı mesüliyetke çekmege çağıra.