Ruslar tarafından 17 yılğa qadar apis cezasına maküm etilgen kör qırımtatar siyasiy mabüsi Oleksandr Sizikovnı Minusınsk şeeriniñ apishanesinden Krasnoyarsktaki bölge verem hastahanesine avuştırğanlar. Anda o, şahsiy reabilitatsiya ve abilâtsiya programmasınıñ (IPRA) resmiyleştirilüvinden keçe. Bu aqqında “Qırım birdemligine” onıñ anası Olena Sizikova bildirdi.
Onıñ aytqanına köre, körüvi bütünley yoq olğanından Oleksandr öz başına mektüpler oquy ve yaza bilmey, şunıñ içün o, diger mabüslernıñ yardımını soray. Oğlundan kelgen bir qaç beyanattan soñ, qadın, programmanı azırlamaq içün kerek olğan eki teşkerüvden keçkenini bildi.
IPRA – saqatlıqqa saip olğan insan içün tibbiy, içtimaiy ve ihtisas tevsiyelerini ve reabilitatsiya içün kerek olğan tehnikiy vastalarnıñ cedvelini belgilegen resmiy vesiqa.
“Saşa anda çiçek ayından berli buluna. O, palatаnıñ qomşusından birine şahmat oynamağa ögretti. Özleri de degişken kibi, kör adam körge şahmat oynamağa ögretti. Bu onıñ yekâne tevsiyesi”, – Olena Sizikova dep qayd etti.
Hatırlatamız: orta küz ayınıñ 24-nde Qırımnıñ işğal Bağçasaray rayon makemesi kör Sisikovnı “politsiyağa boysunmağanı” içün 10 künge memuriy apis cezasına maküm etti. Bir kün evelsi onıñ evinde ve anasınıñ evinde işğalciler gece tintüv keçirdiler.
2025 senesi orta küz ayınıñ 31-nde Qırım Yuqarı makemesi rusiyege boysunğan Bağçasaray rayon makemesiniñ körüngen Qırım siyasiy mabüs Oleksandr Sisikovnıñ memuriy apis qararını lâğu etti. İmzağa köre, onı sağlıq vaziyeti sebebinden apiste qaldırmaq kerek ediler.
2025 senesi qural ayında Krasnoyarsk vilâyetiniñ Minusınsk şeer makemesi Sızikovnı sağlıq vaziyeti sebebinden azat etti – tibbiy teşkerüv vaqtında oña apishanede cezasını çekmek içün uyğun olmağan hastalıqlar cedveline kirgen körüvni bütünley ğayıp etmesi diagnozı qoyuldı. Bundan soñ adam Qırımğa evine qayttı.
Lâkin Oleksandr Sisikov azat etilmedi, qayd etmek kerek.
2025 senesi orta küz ayınıñ 21-nde Krasnoyarsk vilâyet makemesi ağır hasta olğan Qırım siyasiy mabüs Oleksandr Sisikovnıñ azat etilüv qararını lâğu etip, onı apishanege qaytarmağa qarar berdi.
Oleksandr Sisikov – 2009 senesi yol qazasından soñ körligini bütünley ğayıp etken I gruppa saqatı. Bundan da ğayrı, onıñ talağı çıqarılğan, aşqazan ve bel meseleleri bar, bu sebepten o, daima tibbiy baqıluvğa muhtac. Onıñ anası, Olena Sizikova, oğlunıñ apishanede tutulması onıñ sağlığı içün ölüm telükesi olğanını defalarca bildirdi.