Kıyivde qırımtatar çalğıcısı Seyran Berdubekov uzun sürgen hastalıqtan soñ 65 yaşında vefat etti. 2017 senesinden başlap paytahtta yaşay edi ve 2017 senesinden 2024 senesine qadar “Musafir” qırımtatar restoranında çalğıcı olıp çalışa edi. Seyran ağanıñ ölümi aqqında Qırımtatar Resurs Merkezine onıñ tuvğanları haber ettiler.
Seyran Berdubekov Kıyivdeki qırımtatarlar arasında belli edi – medeniy tedbirlerde, kontsertlerde ve cemaat körüşüvlerinde sıq-sıq çala edi.
Aqrabaları, dostları ve tanışları onı, çoq yıl devamında tamır qırımtatar halqınıñ medeniyetini inkişaf ettirmek ve qorçalamaq içün çalışqan samimiy, merametli ve aydın bir insan olaraq hatırlaylar.
Seyran Berdubekovnıñ cenazesi çarşenbe künü, qural ayınıñ 27-de, saat 15-te Çayka köyünde “Birlik” camisinde ötkerilecek.
Qırımtatar Resurs Merkeziniñ hadimleri onıñ oğulları Şeyh Osman ve Ennanğa, soy-soplarına, yaqınlarına ve onı tanığan ve sevgen er keske samimiy taziye eteler.
Allah rahmet eylesin…