İşğalcılar ukrain vatandaşlarını taqip etmek içün mahsus yañı aletler qıdıralar- Bariyev

January 30, 2023

Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev   ‘Çernomorskoye teleradiokampaniyası’na intervyu devamında añlatqanı kibi, rusiye hakimiyeti Ukrainanıñ işğal etilgen territoriyalarında ukrain vatandaşlarını taqip etmek içün yañı aletlerni mahsus tüşünip çıqaralar.

 Eskender Bariyev, işğal etilgen Qırımda ‘Hizb ut-Tahrir’ davası boyunca yañı yaqalamalarnı izaat eterek, qayd etti ki, ‘Hizb ut-Tahrir’ davası özü-özünden ukriantaraflı faallerni taqip etmek içün bir alettir. QRM malümatlarına köre, FSB zindanlarında bu dava boyunca 90-dan ziyade adam oturmaqta, faqat olarnıñ doğrudan doğru mezkür teşkilãtqa alãqaları yoq.

‘Kerçekten, işğalcılar ukrain vatandaşlarını taqip etmek içün mahsus aletler tüşünip çıqaralar. Böyle etip, ‘Noman Çelebicihan adına batalyon’nı terroristik telkilãt olaraq tanıp, yañı maddeler qoşuldı: ‘RF silãhlı küçlerini diskreditastıyasına doğrultılğan areketler’, ya da ‘Natsist temsillerini açıqtan numayış ve teşviq etüv’,- añlattı o.