Çarşenbe künü, 15 martta, Aqmescit rayonı Çüyünci köyünde rusiye silãhlı küçler qırımtatar milliy areket faali Rolan Osmanovnıñ evinde tintüv keçirdiler.
Rolannı Aqmescitteki FSB(havfsızlıq hızmeti) İdaresine alıp ketkenleri belli.
Tintüv 2023 senesi 23 fevralde demiryolnıñ patlatılması munasebetinen keçirligeni tahmin etile.
Advokat Edem Semedlãyevni tutuqlanğannıñ yanına kirsetmeyler.
‘Men añlaşma qurdım, onıñ menfaatlarını taqdim etmege keldim. Körüşmege niyetimni bildirdim. Yanıma FSB yuristkonsultı Ruslan Alekseyçük keldi. 15-daqqağa çıqıp ketti, soñra qaytıp keldi ve Rolannıñ yuridik yardımğa ihtiyacı olmağanını bildirdi. Aytqanına köre, oña qarşı hiç bir protsessual areketler kösterilmey’,- dedi advokat.
Tafsilãtlıca malümatlar ögrenilmekte.
Hatırlatamız ki, işğal etilgen Qırımda rusiye silãhlı küçler qırımtatarlarnıñ evlerinde tintüvler keçireler. Bunıñ sebebi 23 fevralde demiryolnıñ patlatılması kösterile. Soñ 2 hafta içerisinde mezkür mesele boyunca 7 tintüv keçirildi.