QRM yuristi Lüdmila Korotkih ‘Suspilne, Krım’ portalına intervyu devamında 2014 senesinden berli Qırımda zorbalıqsız qarşılıq kösterüv ne qadar deñişkenini añlattı.
‘Qırımda zorbalıqsız qarşılıq, yani muqavemet haqqında laf yürsetmek zordır. 2014 senesi işğal başlağanında eñ küçlü qarşılıq kösterildi. Soñra ise işğalcı hakimiyet yarımadada öz nezaretini pekitken soñ, tabiy ki, vatandaşlar faaliyeti zayıflaşmasa da, deñişti’,- qayd etti Korotkih.
Lüdmila añlatqanı kibi, başta daima narazılıq aktsıyaları keçirile, askerlerge yardım kösterile edi. Yani adamlar pek faal edi. Faqat rusiye hakimyeti yarımadanı öz nezareti altına alğan ve basqı köstermege başlağan soñ qarşılıq kösterme usulı deñişti. Misal olaraq, Reşat Aliyevnen olıp keçken vaqia ve oña oşağanlar insanlarnı bayağı qorquzdı. Kerçekten de, QRM malümatlarına köre, Qırım işğalinden berli 24 adam zorbalıqlı şekilde ğayıp oldı.
‘Muqavemet deñişti. Misal olaraq, mekteplerde ana-babalar qırımtatar ve ukrain tilinde tasil keçirilmesini talap etmege başladılar, saylavlarda iştirak etmediler. 2022 senesi faal qarşılıq kösterilmege başlanıldı: içtimaiy ağlarda dercler, ukrain muzıkanıñ işletilmesi ve il. Faqat böyle usulda qarşılıq sıq kösterilmedi’, – qoştı o.
Yurist qayd etkeni kibi, Qırım siyasiy mahbüslerni de unutmamalı. Olar da qarşılıq köstermekteler, çünki siyasiy sebeplerden dolayı hapiske alındılar.