İşğal etilgen Qırımda qırımtatar qaçırıldı

March 19, 2023

Cuma künü, 2023 senesi 17 martta işğal etilgen Qırımda Aqmescit rayonı Yañı Sarabuz köyünde 29 yaşlı qırımtatar Tair Seydametov qaçırıldı.

Qırımtatar Milliy Meclis reisi Refat Çubarov bildirgeni kibi, Tair Seydametov aqrabalarında musafirlikte bulunğanda, tahminen saat 17.20 kündüz qaçırıldı.

Şaatlarnıñ aytqanlarına köre, erkek ağasınen birlikte azbarda turğan vaqıtta, yanlarında beyaz ‘Gazel’ maşnası toqtadı, içinden 7 adam çıqıp, hiç bir vesiqa köstermeden, özlerini tanıtmadan Tair Seydametovnı avtomobil içine kirsetip, belgisiz yerge alıp kettiler.

Aynı şu künü, gece maalinde Tair ana-babasına telefon etip, 18 mart sabası evde olacağını bildirdi. Faqat bu künge qadar bulunğan yeri belgisizdir.