Vaqtınca işğal etilgen Qırımda «akimiyet» rusiyeniñ Mudafaa Nazirliginen muqavele imzalağan adamlarğa bir kerelik tölevlerni bayağı arttırdı. Bugünden başlap bu para 1,2 million rubl($15700) teşkil ete, bu evelki 800 biñden($10500) bayağı ziyadedir. Daa er ay olğan aqça ödevi ve ilâve imtiyazlarnı da vade eteler.
İşğal idaresi böyle tekliflerni faal sürette teşviq ete, yañı kontraktlı işçilerni celp etmege tırışa, maddiy stimullarnı esas argument olaraq qullana.
Aynı zamanda, belli olğan malümatqa köre, bu tek göñülli cebege alınuv degil de, vaqtınca işğal etilgen topraqta qanunsız seferberligi devam ete.
Yüksek tölevler vade etilgenine baqmadan, Ukrayinağa qarşı cenkte endi 2000-den ziyade Qırım sakini elâk olğanı belli. Bu ise müim coyumlarnı köstere ve böyle «içtimaiy kefaletlerniñ» kerçek fiyatı aqqında sualler doğura.
Qırımtatar Resurs Merkezi böyle siyasetniñ kadr yetişmezligini kompensatsiya etmege ve maddiy rağbetlendirüv vastasınen küreşke yañı iştirakçilerni celp etmege areket olğanını qayd ete.
Fotoresim: QRM