İrina Daniloviçke dair çıqarılğan hüküm munasebetinen QRM-niñ beyanatı

December 29, 2022

2022 senesi 28 dekabr künü Kefe şeheri işğalcı mahkeme tarafından jurnalist, tib hadimi İrina Daniloviçke nisbeten hüküm çıqarıldı: 7 yıl azatlıqtan mahrum qaldıruv ve 50 biñ ruble para cezası.

 İşğalcı mahkeme Ukraina vatandaşı İrina Daniloviçni ‘patlayıcı maddeler ve patlatıcı tertibatnı qanunsız saqlağanında’qabaatlay.

Her vaqıt olğanı kibi, qabaatlav tintüv ketişatında silãhlı küçler tarafından gizliden qaldırılğan ‘deliller’, ‘gizli şaatlar’nıñ  aytqanları, ‘ekspertler’niñ hülãsaları esasında çıqarıldı. Eñ mühimi şu ki, ‘dava’nıñ özü – halqara huquqnıñ qaba bozuluvıdır, çünki işğal etilgen territoriyalarda işğalcılarnıñ qanunları çalışmaz.

QRM beyan ete ki, mezkür qarar qanunsızdır, siyasiy sebepli ve cinaiydir. Rf siyaseti işğalni tanımağan Ukraina vatandaşlarını qorquzmaq, uzaqlaştırmaq maqsadını taşıy.

QRM israrlı qarşılıq köstere ve cinaiy hükümniñ lãğu etilmesni, siyasiy mahbüslerniñ azat etilmesini talap ete.