19 fevral künü Etnosiyaset ve vicdan serbestligi boyunca Ukraina Devlet Hızmeti(GESS) yanında Cemaat şurasınıñ toplaşuvı keçirildi.
Körüşüvde GESS reisi Viktor Yelenskiy, QRM reisi, GESS yanında Cemaat Şurasınıñ reisi Eskender Bariyev, GESSniñ diger şübeleriniñ yolbaşçıları ve temsilcileri iştirak ettiler.
Toplaşuvda Ukraina Nazirler Kabinetiniñ ‘Yoq olmaq havfı altında bulunğan Ukraina milliy azlıqlarnıñ tiller Cedveliniñ tayin etilmesi haqqında’ qarar leyhası muzakere etildi. Mezkür vesiqa Ukrain Milliy ilimler akademiyasınıñ ilmiy teklifleri ve halqara standartlarğa esaslana. Cedvelge destekke muhtac olğan 9 til kirsetildi: aqrus, gagauz, idiş, qaray, qırımtatar, qırımçaq, rom, rumey, urum.
Cemaat şurasınıñ reisi Eskender Bariyev qoruvğa muhtac olğan tillerniñ doğru belgilenme kriteriyalarınıñ emiyetini ve qoruv strategiyasını işlep çıqarmaq kerekligini qayd etti.
Neticede qarar leyhasına her kesniñ tarafından destek kösterildi. Ukraina Nazirler Kabinetiniñ ‘Yoq olmaq havfı altında bulunğan Ukraina milliy azlıqlarnıñ tiller Cedveliniñ tayin etilmesi haqqında’ qarar leyhasına ‘tamır halqlar’ añlamını kirsetmege teklif etildi.