“Canköy dörtünci gruppası”ndan beş Qırım siyasiy mabüsi Rostov-na-Donudaki №1 tahqiqat izolâtorından Novoçerkask SİZO-sına ketirildi, yani Emir Kurtnezirov, Abibulla Smedlâyev, Rustem Mustafayev, Mirzali Tacıbayev ve Bahtiyar Ablayev. Bunı “Qırım birdemligi” adliyecisi ve dava mabüslerinden birisiniñ qadını Safiye Kurtnezirova haber etti.
“Makemeci soñki makeme oturışuvında aytqanına köre, aqaylar Rostov-na-Donudaki SİZO-sında yerler yetmegeni içün başqa tahqiqat izolâtorına avuştırıla”, – Safiye Kurtnezirova dep qayd etti.
Onıñ aytqanına köre, Rostov-na-Donudaki SİZO-sında qırımtatarlar keçken sene ilk qış ayında işğal etilgen Qırımdan ketirilgen soñ buluna ediler. Şimdi “Canköy dörtünci gruppası”nıñ davası Cenübiy okrugınıñ arbiy makemesinde baqıla.
Evelden bu makemede baqılğan Qırımnıñ siyasiy sebepli davalarınıñ mabüsleri, makeme tahqiqatı yekünlenmegence ve üküm çıqarılğance, adetince Rostov-na-Donudaki SİZOsında tutula edi. Maküm etilgenlerniñ Novoçerkaskke makemeden evel avuştırılması, Rostov SİZO-larında yerler yetmegeninden sebep, mabüslerniñ tutulması vaziyetiniñ deñişkenini köstere bile.
Hatırlatamız: beş qırımtatarnıñ evinde tintüvler 2025 senesi kiçik ayınıñ 5-nde keçirildi. Aynı şu künü olardan üçünen Aqmescitteki SİZO-2-ge yerleştirdiler, ertesi künü ise Mirzali Tacibayev ve Bahtiyar Ablayev anda ketirildi. Tutulğanlarnıñ episi “Hizb ut-Tahrir” islâm siyasiy firqasınıñ faaliyetinde qabaatlandılar.
Dava mabüsleriniñ tuvğanları, tintüvler vaqtında FSB hadimleri yasaq etilgen kitap ve broşuralarnı atqanlarını ve tintüv protokollarınıñ kopiyasını olarğa qaldırmağanlarını iddia eteler.
Fotoresim: “Qırım birdemligi”