2026 senesiniñ çiçek ayınıñ 20-nci, bazarertesi künü Nyü-Yorkta BMTniñ tamır halqlar meseleleri daimiy forumınıñ XXV sessiyasınıñ açıluv merasimi olıp keçti, o qural ayınıñ 1-ge qadar devam etecek.
Tedbirde Qırımtatar Resurs Merkeziniñ İdare reisi ve Qırımtatar Milliy Meclisiniñ tışqı munasebetler ve insan aqları qorçalayıcı faaliyeti bölüginiñ müdiri Eskender Bariyev, Qırımtatar Resurs Merkeziniñ meneceri ve uquqçı Lüdmila Korotkih, Qırımtatar Milliy Meclisiniñ reisi Refat Çubarov. faal iştirak etecekler.
Bu yılnıñ sessiyasınıñ mevzusı: «Tamır halqlarnıñ sağlığını teminlemege, hususan dava şaraitte».
Tamır halqlar biñyıllıqlar devamında insaniyetni devam ettirgen medeniyetniñ, bilgilerniñ ve yaşayış tarzlarınıñ qorçalayıcılarıdır, olarnıñ dünya qararlar qabul etüv ceryanlarında iştirak etüvi bugün er vaqıttan da müimdir – BMTniñ Baş kâtibi Antoniu Guterriş açıluv vaqtında qayd etti.
Daa, o kompleks areketlerge muhtac dört esas doğrulışını qayd etti:
tamır halqlarınıñ aqları aqqında BMTnıñ Beyannamesiniñ bütün aza devletler tarafından amelge keçirilmesi, hususan tamır halqlarınıñ aqlarını devlet qanunlarında qayd etüv ve olarnıñ qararları, topraqları ve resursları boyunca serbest, evelden ve malümatlı razılıq printsipini temin etüv;
qararlarnıñ qabul etilmesiniñ bütün seviyelerinde olarnıñ iştiragini temin etmek, kerekli ve turğun maliyenen;
tamır halqlarını, olarnıñ liderlerini ve aq-uquq qorçalayıcılarını qorçalamaq ve olarğa qarşı zorbalıq, taqip ve telükelerni toqtatmaq;
tamır halqından qadınlar ve qızlarınıñ qarar aluv ceryanlarında rolüni quvetleştirmek.
Hatırlatamız: BMTniñ tamır halqlar meseleleri daimiy forumı – bu tamır halqlarnıñ iqtisadiy ve içtimaiy inkişafı, medeniyet, etraf müit, tasil, sağlıq ve insan aqlarınen bağlı meselelernen oğraşqan eñ yüksek mesleat organıdır.
Bu tedbir ve Ukrayina tamır halqlarınıñ vekilleriniñ iştiragi aqqında bilmek içün bizni közetiñiz.
Foto: QRM, Pawanka Fund