Tam bir yıl evel 5 iyün künü qırımtatar Milliy Meclisi Ukraina etnosiyaset ve vicdan serbestligi devlet hızmetine qırımtatar halqınıñ temsil organı olaraq huquqiy statusınıñ pekitilmesi içün vesiqalarnı tapşırdı.
Şunı qayd etmege ister edik ki, Ukraina seviyesinde QRM temsilcileri ‘Ukraina tamır halqları haqqında’ Ukraina qanunınıñ amelge keçirilmesi içün vesiqalar ve qanunlarnı azırlamasında faal iştirak etmekteler.
QRM yuristleri qırımtatar Milliy Meclisiniñ huquqiy faaliyet ve tış bağlar idaresine Milliy Meclis tamır halqnıñ temsil organı olaraq huquqiy statusını pekitmek içün vesiqalarnı azırlamağa yardım ettiler.
Qırımtatar Milliy Meclisiniñ huquqiy statusı resmiy belgilense ne olacaq?
– niayet Qırımtatar Milliy Meclisiniñ Ukraina tamır halqınıñ temsil organı olaraq tap 1991 senesinden başlağan huquqiy izinlik esnası yekünlenecek.
– qırımtatar Milliy Meclisi huquq esnasında Qırım ve Ukraina tamır halqlarınen bağlı Ukraina devlet siyasetiniñ şekilenmesinde iştirak etecek. Ukraina tamır halqlar ve qırımtatarlarnıñ haqları, menfaatlarına dair regional, devlet programmalarınıñ işlep çıqarılması ve amelge keçirilmesinde iştirak etecek.
– qırımtatar Milliy Meclisiniñ halqara seviyedeki mevamlarını qaviyleştirir, şu cümleden rusiye işğalcıları tarafından tamır halqnıñ irq diskriminatsıyası meselelerinde.
– Ukraina itibarını qırımtatar halqı, şu cümleden diaspora, qaray ve qırımçaqlar arasında köterecek.
– Milliy Meclisniñ daha açıq ve temiz işine yol açacaq.
– Milliy Meclisniñ ‘Ukraina tamır halqları haqqında’ qanunnıñ amelge keçirilmesinde imkãnlarını arttıracaq, yani temsil organnıñ faaliyetini Ukraina devlet sermiyasınıñ ayrı programması boyunca maddiy desteklemesine dair qanunlarnıñ işlep çıqarılmasında, çetel devletlerden, halqara teşkilãtlardan maddiy, tehnikiy, hayriye, gumanitar yardımnı almasında, qırımtatar tili, tarihı, medeniyetiniñ inkişafında, tamır halqnıñ KHV peyda etilmesinde ve il.
Ümüt etemiz ki, eñ yaqın zamanda Milliy Meclis niayet Ukraina qanun alanında Ukraina tamır halqınıñ temsil organı olaraq öz yerini alacaq.