Bir aydan ziyade Qırım siyasiy mabüs Serğiy Lihomanov aqqında iç bir haber yoq. Onıñ qayda olğanını, başına ne kelgenini bilmeyip, qorantası ve dostları raatsızlana. Hususan, onıñ çoqtan-çoq hronik hastalıqlardan çekişe ve rusiyedeki eñ qattı SİZOlardan Taganrogdaki birinde oturıp azaplana. Böyle malümatnı Qırımtatar Resurs Merkezi aldı.
Serğiy Lihomanov evelde sağlığınıñ bozulğanı ve ilâclarğa muhtac olğanı aqqında haber etti. Bunı onıñ qız qardaşı Tetâna Zelena Qırımtatar Resurs Merkezine, 2026 s. kiçik aynıñ 8-nci künü yazğan, kiçik aynıñ 16-ncı künü qorantağa kelgen mektüpke esaslanıp ayttı. Mektüpleşüv sıñırlavları sebebinden o, öz alını doğrudan-doğru tariflep olamay, amma sağlıq aqqında ciddiy meseleniñ tam ilâclar istegenini köstere.
Hususan, siyasiy mabüske içekler ve prostata hastalıqları içün ilâclar kerek. Evelde oña “proktosigmoidit” ve “sigmoid divertikulit” diagnozı qoyulğan edi. Daa, onıñ tirseginde ağır ösmürlik tapılğan. Qısmiy tibbiy yardımdan soñ ağrı devam ete, teşkerüv neticelerini oña alâ daa bermediler.
Serğiy Lihomanovnıñ sağlığı başqa hronik hastalıqlarnen müşkülleşe. Şu cümleden, grıjalı disklernen lumbosakral östeohondroz (L3-S1), şekilsizleşken spondiloz, büyük büyrek kistası mürekkepleştireler. Bu ise ilerideki teşkerüvlerni talap ete. Buña baqmadan, oña yeterli derecede tibbiy yardım etilmey.
Bu diagnozlar sebebinden oña mahsus aşayt kerek, lâkin SİZOda öyle imkân yoq. Kerekli erzaq malları ve doğru ğıdalanuvnıñ olmaması onıñ hastalıqlarınıñ ağırlaşmasına ve zayıflaşmasına ketire.
Qırım siyasiy mabüsiniñ qız qardaşı Tetâna Zelena halqara cemiyetke muracaat etip, çeşit halqara forumlarda çıqışlarnı etip, qardaşınıñ azat etilmesi içün er türlü areketni etmege devam ete.
Hatırlatamız: 2024 s. qural aynıñ 15 künü Aqyarnıñ Gagarin rayonınıñ «Makemesi» Serğiy Lihomanovnı rusiye Cinaiy Kodeksiniñ 222.1-nci maddesiniñ 3-nci qısmınıñ «в» punktı boyunca qabaatlı qabul etti ve 50 biñ rubl (~$570) para cezasınen onı qanunsız olaraq beş yılğa cezasına maküm etti. Soñra, oña qarşı rusiye Cinaiy Kodeksiniñ 275-nci maddesiniñ 30-nci qısmınıñ 1-nci qısmı ve 205-nci maddesiniñ 2-nci qısmınıñ «в» punktı boyunca daa bir cinaiy iş açıldı. 2025 s. orta küz ayınıñ 8-nci künü onı qanunsız olaraq ekinci kere — bu sefer 15 yılğa ceza müstemlekesine, 50 biñ rubl (~$570) para cezasınen, maküm ettiler. Serğiy Lihomanov şimdi Taganrogdaki №2 SİZOda tutulmaqta.