Qırımtatar Resurs Merkeziniñ İdare Reisi, Qırımtatar Milliy Meclisiniñ azası Eskender Bariyev, rusiye akimiyetiniñ soñki qararları ve işaretleri devletniñnenrideki arbiyleştirilüvi ve yañı seferberlik tedbirlerine azırlanılğanını köstere bile, dep bildirdi.
Onıñ aytqanına köre, böyle signallardan biri rusiye silâlı quvetleriniñ sayısını arttırğan rusiye prezidentiniñ buyruğı oldı.
“Bu, resmiy olaraq devletniñ mudafaa qabiliyetiniñ quvetleştirüvi olaraq kösterile, lâkin cebede büyük zarar körgen şaraitlerde böyle qarar Ukrayinağa qarşı istilâcı cenkni devam ettirmek içün yañı insan resurslarına ihtiyac olğanını köstere”, – Bariyev dep qayd etti.
O, rusiye merkeziy bankıniñ yolbaşçısı Elvira Nabiullinaniñ mevamına dair haberlerge de diqqat çekti. Haberlerge köre, o, arbiy vaziyet ya da sıñırlarnıñ qapatıluvı vaziyetinde vazifede qalmağa planlaştırmay, çünki buniñ rusiye iqtisadiyatına menfiy tesir etecegini añlay.
“Bu haberler kerçekke oşağanından azmı-çoqmı, bu kibi munaqaşalarniñ peyda oluvı rusiye elitaları, hususan devletniñ daa çoq arbiyleştirilüvinen bağlı, türlü adiselerniñ inkişaf senariylerini baqqanını köstere”, – dep qayd etti.
QRM-niñ İdare Reisi vaqtınca işğal etilgen topraqlarda vaziyetke, hususan Qırımda olğan vaziyetke ayrı diqqat ayırdı.
“2022 senesi “qısmiy seferberlik” vaqtında işğal akimiyeti qırımtatarlarnıñ toplu yaşağan yerlerinde tintüvler keçirdi, cıyıntıqlarnı berdi ve Ukrayina tamır halqıniñ vekillerine nisbetsiz seferberlik basqısı yaptı. Asılında qırımtatarlar ve işğal etilgen yarımadanıñ diger sakinleri kreml tarafından cenk içün resurs olaraq baqıla edi”, – Bariyev dep qayd etti.
Onıñ aytqanına köre, yañı seferberlik dalğası ya da daa sert seferberlik tedbirleri kirsetilse, vaqtınca işğal etilgen topraqlarniñ sakinleri kene de bu siyasetniñ birinci fedaları ola bileler.
“Ordu sayısını arttırmaq fermanı, seferberlik ritorikası ve memleket içinde nezaretni quvetleştirüv kremlniñ cenkni toqtatmaq içün yollar qıdıruv yerine, cenkni devam ettirgenini köstere”, – dedi.
Eskender Bariyev halqara toplulıq tarafından Ukrayinağa qol tutuvniñ müimligini ve rusiyeniñ içinde ve Ukrayinaniñ vaqtınca işğal etilgen topraqlarında olıp keçken esnaslarnı diqqatnen taqip etmek kerekligini qayd etti.