Qırımtatar Maaliy Merkeziniñ
Birleşken Milletler, Avropada Havfsızlıq ve İşbirlik Teşkilâtı, diger halqara teşkilâtlar, bütün dünya memleketlerniñ ükümet ve parlamentlerine Qırımdaki Rusiye işğalci akimiyetiniñ temsilcilerine onlayn rejiminde ötkerilgen halqara tedbirlerde iştirak etmege yol berilmemesi aqqında
muracaatı
2020 senesi iyunniñ 22-de ve 23-de "Söz, media ve malümat serbestligi" mevzusındaki Avropada Havfsızlıq ve İşbirlik Teşkilâtınıñ II koşumca muşaveresi keçti.
COVID-19 qırğınlığı sebebinden tedbir onlayn rejiminde ZOOM platformasında ötkerildi. Muşavereniñ bu şeklinde keçirilüvi sözde "Qırım Cumhuriyeti" akimiyetiniñ temsilcilerine qarşı kirsetilgen sıñırlavlar ve ilhaqnıñ tanımamazlıq siyasetini körmemezlikke urmağa imkân berdi.
Böyleliknen, muşaverede sözde "Qırım Cumhuriyetiniñ Nazirler şurası reisiniñ muavini – Rusiye prezidenti yanında Qırım Cumhuriyetiniñ daimiy vekili" Georgiy Muradov sözge çıqtı.
İşğalci akimiyetiniñ "memurı" olğan Georgiy Muradov, sanki "Russian Association for International Cooperation" cemaat teşkilâtını temsil etti.
2014 senesi martnıñ 17-de Avropa Birliginiñ Şurası 2014/145/CFSP qararını qabul etti. Şu qararğa köre Ukrainanıñ mustaqilligi ve bütünligine qarşı areket etkeni içün Georgiy Muradovğa nisbeten aktivler buzlatuvı ve yolculıqqa sıñırlavlar şeklinde sanktsiyalar kirsetildi.
Böyleliknen Avropada Havfsızlıq ve İşbirlik Teşkilâtınıñ qaideleri, onıñ ştab-kvartirası yerleşken Avropa Birliginiñ sıñırlav siyaseti ve Rusiye tarafından Qırım ilhaq etilgenini tanımamazlıq siyasetine köre Georgiy Muradovğa Avropada Havfsızlıq ve İşbirlik Teşkilâtınıñ tedbirlerinde iştirak etmege yasaq.
Qırımtatar Maaliy Merkezi, Avropada Havfsızlıq ve İşbirlik Teşkilâtınıñ demokratik institutları ve insan aqları Bürosı Avropa Birliginiñ qanunları ve muşavere ötkerilmesi qaidelerini bozılmaması içün çarelerni körmegenine yazıqsınlay.
Şimdiki vaziyet ve devam etken COVID-19 qırğınlığı munasebetinen
Qırımtatar Maaliy Merkezi halqara teşkilâtlar, Birleşken Milletler azaları olğan devletlerge sözde "Qırım Cumhuriyeti" temsilcileri ve Ukrainanıñ mustaqilligi ve bütünligine qarşı areketler yapqan şahıslarğa onlayn rejiminde ötkerilgen halqara tedbirlerde iştirak etmege yol bermemek içün bütün kerekli çarelerni körmege muracaat ete.
24.06.2020
Qırımtatar Maaliy Merkezi idaresiniñ yolbaşçısı
Eskender Bariyev