Ukrayina Yuqarı Şurasınıñ Reisi Ruslan Stefançuk, İspaniya Qırallığı Deputatları Kongressiniñ Reisi Fransina Armengolnen körüşkende, 1944 senesiniñ qırımtatar halqınıñ sürgünligini genotsid olaraq halqara seviyede tanılması meselesini köterdi. Bu aqqında Ukrayina Yuqarı Şurasında bildirdiler.
Körüşüv Kıyivde İspaniya parlamentiniñ aşağı palatasınıñ yolbaşçılığınen eki taraflı munasebetler tarihında ilk ziyaret çerçivesinde olıp keçti.
Muzakere esnasında Ruslan Stefançuk qural ayınıñ 18-inci künü Ukrayina qırımtatar halqınıñ genotsidi fedalarınıñ hatırasını añdıracağını hatırlattı – Sovetler totalitar rejiminiñ eñ ağır cinayetlerinden biri. Bu munasebetnen o, tarihiy adaletniñ ğayrıdan tiklenmesinde halqara ortaqlarğa qol tutmaq müimligini qayd etti.
Yuqarı Şura Reisi ispan tarafını 1944 senesi qırımtatar halqınıñ sürgünliginiñ genotsid olaraq tanılması içün halqara ğayretlerge qol tutmağa çağırdı.
Bundan da ğayrı, taraflar Ukrayinağa daa çoq destek kösterüv, ava mudafaasınıñ quvetleştirilüvi, rusiyege qarşı sanktsiyalar qoyulması, istilâ cinayeti boyunca mahsus makemeniñ meydanğa ketirilmesi, em de Rusiye tarafından sürgün etilgen ya da mecburen köçürilgen ukrayin balalarınıñ qaytarıluvı meselelerini muzakere ettiler.
Ruslan Stefançuk, Ukrayinanıñ siyasiy, mudafaa, gumanitar ve maliyeviy destegi içün İspaniyağa teşekkür bildirdi.
“Ukrayinağa qoltutuvnen bağlı er bir vesiqa – birlik, azatlıq ve halqara uquqnı qorçalavğa sadıqlıq ve qararlılıqnıñ küçlü bir işaretidir”, – dep qayd etti Ukrayina Yuqarı Şurasınıñ Reisi.
Qırımtatar Resurs Merkezi qırımtatar halqınıñ sürgünliginiñ genotsid olaraq tanılması içün demokratik devletlerniñ parlamentleri ve ükümetleri seviyesinde halqara advokatlıq işini devam ete.