2021 senesi 16 avgust künü Rostov-na-donu Cenübiy arbiy mahkemesinde ‘Hizb ut-Tahrir davası’ boyunca soñ mahkeme toplaşuvı keçirildi. Lenur Halilov, Ruslan Mesutov, Ruslan Nagayev, Eldar Kantemirovğa dair mahkeme hükmü çıqarıldı.
Lenur Halilov RF CK 1 q. 205.5 madde, 1 q. 30 madde ve 278 madde boyunca cinayet yapmasında qabaatlı tanıldı ve 18 sene hapiske mahküm etildi;
Ruslan Mesutov RF CK 1 q. 205.5 madde, 1 q. 30 madde ve 278 madde boyunca cinayet yapmasında qabaatlı tanıldı ve 18 sene hapiske mahküm etildi;
Ruslan Nagayev RF CK 1 q. 205.5 madde, 1 q. 30 madde ve 278 madde boyunca cinayet yapmasında qabaatlı tanıldı ve 13 sene hapiske mahküm etildi;
Eladar Kantemirov RF CK 1 q. 205.5 madde, 1 q. 30 madde ve 278 madde boyunca cinayet yapmasında qabaatlı tanıldı ve 12 hapiske mahküm etildi.
Erkekler, Aluşta sakinleri, 2019 senesi 10 iyünde evlerinde keçirilgen tintüvlerden soñ tutuqlandılar.
Lenur Halilov(doğma 1967 s.)- ‘Aluşta’ din cemiyetiniñ tesisçisi ve yolbaşçısı;
Ruslan Mesutov(1965 s)- ‘Aluşta’ diniy cemiyetinde qaravul;
Ruslan Nagayev(1964 s.)- iş adamı;
Eldar Kantemirov(1980 s.)- arab tilşınası, iş adamı, faalli.
Mezkür ‘dava’da qabaatlavlar ‘gizli şaat’larnıñ aytqanlarına ve FSB ile faal işbirlik köstergen ekspertlerniñ qararlarına esaslanıp çıqarıldı. Tintüv vaqtında tapılğan yasaq edebiyat, FSB malümatları, diniy ve siyasiy mevzularda alıp barılğan munaqaşalarnı qayd etken audiolar delil olaraq kösterile. Faalllilerni Rusiyede yasaq etilgen ‘Hizb ut-Tahrir’ teşkilãtınıñ faaliyetinde iştiraginde qabaatlaylar.
‘Dava’ ketişatında halqara haqlar qaba şekilde bozula. ‘Qabaatlanğanlar’nıñ sistemli olaraq serbestlik, şahsiy ve aileviy hayatına hürmet, fikir serbestligi, vicdan ve din serbestligi haqqı sıñırlanıldı. Olarğa qarşı insaniyetsiz, ıncıtıcı munasebet kösterildi. RF-nıñ işğalcı devlet olaraq IV Jeneva Konventsıyasına binaen öz cinaiy qanunlarını Qırım territoriyasında işletmek haqqı yoq.
Qırımtatar resurs merkezi mezkür qararğa qatiyen qarşı çıqa ve onı qanunsız, siyasiy ve cinaiy dep saya.
RF-nıñ böyle siyaseti- olardan farqlı tüşüncege qarşı, işğal etilgen Qırımda insanlarnıñ diniy ve siyasiy noqta-i nazarlarğa qarşı küreşniñ numayışıdır. Şundan da ğayrı, Rostov-na-Donu Cenübiy arbiy mahkemeniñ hükmü qırımtatarlarğa qarşı basqı yapılğanını tasdiqlay. RF öz qanunlarını siyasiy menfaatlarında qanunsız şekilde, ayrıca, qırımtatarlarnıñ Qırım işğaline qarşı itiraz ve zorbalıqsız küreşini bastırmaq maqsadınen qullanıla.
Qırımtatar resurs merkezi
‘Hizb ut-Tahrir davası’nıñ iştirakçilerine çıqarılğan mahkeme qararını lãğu etmege ve siyasiy mahbüslerni azat etmege talap ete.
Qırımtatar resurs merkezi halqara cemaatçılıqnı Qırımda siyasiy taqiplerini toqtatmaq maqsadınen Rusiye Federatsıyasına basqını arttırmaq ve Qırımda insan haqlarını bozuvları içün mesüliyetli şahıslarğa qaşrı sanktsıyalar kirsetmege çağıra.
Qırımtatar Resurs merkeziniñ matbuat-hızmeti