Avropa Birligi rusiyeniñ Ukrayinağa qarşı tecavuz cinayetine dair mahsus makemeniñ qurucılarına qoşulmağa qarar aldı.
Belli ki, qural ayınıñ 5-nde AB Şurası Avropa Birligi tarafından rusiye Federatsiyasınıñ Ukrayinağa qarşı tecavuz cinayetini baqqan mahsus makemeniñ teşkil etilmesi aqqında kenişletilgen qısmiy añlaşmanı imzalamağa qararını tasdıqladı.
Añlaşmanıñ Avropa Şurası Nazirler Komitetinde tasdıqlanmasından soñ Avropa Birligi resmiy şekilde vesiqanı imzalay bilecek. Bundan soñ Avropa Komissiyası AB Şurasına AB-niñ makemege soñki qoşuluvı aqqında teklifini berecek.
Avropa parlamenti razılığını bergen soñ ve kerekli areketler yekünlengen soñ, AB mahsus makemeniñ qurucılarından biri olacaq ve onıñ reberlik komitetine kirecek, dep beklenile. Avropa Birligi bu halqara mehanizmniñ faaliyetinde yetekçi rol oynacaq.
Hatırlatamız: mahsus makeme Avropa Şurası reberligi altında 2025 senesi ilk yaz ayınıñ 25-te Ukrayina ve Avropa Şurası arasında onıñ qurulması aqqında añlaşma imzalanğan soñ meydanğa ketirile. Onıñ vazifesi rusiyeniñ eñ yüksek reberligini Ukrayinağa qarşı tecavuz cinayeti içün mesüliyetke çekkenini közde tuta.
Ukrayina Tış işler nazirliginiñ bildirgenine köre, bugünge qadar 25 devlet Ukrayinağa qarşı tecavuz cinayeti mahsus makemeniñ teşkil etilmesi aqqında kenişletilgen qısmiy añlaşmağa qoşulmaq niyetini tasdıqladı.
Qayd etilgenine köre, añlaşmanıñ soñki qabul etilmesi qural ayınıñ 14-15 künleri Moldovada keçirilecek Avropa Şurası Nazirler komitetiniñ toplaşuvında beklenile.
Makeme qurulmasını desteklegen devletler koalitsiyasına Ukrayina, Avstriya, Belçika, Hırvatistan, Çehiya, Estoniya, Finlândiya, Frenkistan, Almaniya, Yunanistan, İslandiya, Latviya, Lihtenşteyn, Litvaniya, Lüksemburg, Moldova, Felemenk, Norvegiya, Poloniya, Portugaliya, Sloveniya, İspaniya, İsveçiya, Birleşken Qırallıq ve Kosta-Rika kirdi.
Nürnberg esnasından berli ilk sefer devletler beraberlikte ve koordinatsiyada istilâ cinayeti içün mesüliyetke çekilüvini temin etmek içün çalışa. Olar Avropa ve dünyanıñ diger memleketlerini de bu halqara teşebbüske qoşulmağa çağırdılar – teşebbüsniñ iştirakçileri qayd eteler.