Cuma künü, mayısnıñ 27-sinde işğal etilgen Qırımda Aqmescitte Merkeziy rayon mahkemesi binasınıñ yanında meslekdeşi Nazim Şeyhmambetovnı qorumaq maqsadınen kelgen advokatlar Ayder Azamatov ve Emine Avamilevanı tutuqladılar. Bu aqta ‘Qırım birdemligi’ haber ete.
‘Polis hadimleri meni ve advokat Emine Avamilevanı Merkeziy rayon mahkemesi binasınıñ yanında vazifelerimizni eda etkenimiz vaqtında tutuqlap, B.Hmelnitskogo soqağına idariy huquq bozuluvı adisesini talil etmek içün alıp ketmekteler’,- bildirdi advokat Ayder Azamatov.
Hatırlatamız ki, 26 mayıs künü ekstremizmge qarşılıq Merkeziniñ hadimleri işğal etilgen Aqmescitte advokat Edem Semedlãyevni iştimaiy ağlarda paylaşqan malümat içün tutuqlap, 75 biñ ruble para cezasına mahküm etken ediler. Şunda da ğayrı, Edem Semedlãyevni qorumaq maqsadınen Kiyev rayon mahkemesine kelgen advokat Nazim Şeyhmamabetov da tutuqlandı.