Çarşenbe künü, mayısnıñ 18-inde AQŞ İvanston ştatında Northwestern University üniversitetinde rejissör Kristina Paşinniñ ‘Vatan oğrunda küreş:qırımtatarlar’ vesiqalı filmniñ onlayn taqdimi olıp keçti. QRM meneceri Zarema Bariyeva tedbirde iştirak etip, qırımtatar halqınıñ zemaneviy vaziyetini añlattı.
Öz çıqışında Bariyeva 1944 senesi qırımtatarlarnıñ facialı sürgüni, sovet askerleri tarafından qırımtatar medeniyeti, tarihı, tiline ketirilgen zararından bahs etti.
Menecerniñ aytqanına köre, Rusiye yarımadanı işğal etkeninden biñlernen qırımtatar öz yurtunı terk etmege mecbur qaldılar, bazıları ise vatandaşlıq mevamları içün taqipke oğratıldı. Şundan da ğayrı, o, qırımtatarlarnıñ temsil organı Milliy Meclisniñ faaliyeti yasaq etilgeni, qırımtatar liderlerine vatanına yol yasaqlanğanı, özleri ğıyabiy tutuqlanğanları, Rusiye ordusına hızmet etmege çağırğanları, Qırımda qırımtatar tiliniñ ögrenilmesinde sıñırlamalar ve bir sıra diger meseleler haqqında añlattı.
‘Rusiye Ukrainağa ücüm etkeni Qırımda ve Ukrainanıñ işğal etilgen territoriaylarında insan haqlarınen bağlı vaziyetni daha fenalaştırdı. Bu yerlerde insanlar basqı ve diskriminatsıya altında bulunmaqtalar’,- dep qoştı o.
Zarema Bariyeva halqara cemaatçılıqnı QRM faaliyetinen, ayrıca da bütün dünyada keçirilgen kampaniyalarnen tanıştırdı.
‘1944 senesi yüz bergen cinayetler şübesiz dünya ülkelerniñ milliy parlamentleri tarafından tekbih etilmeli, yoqsa cinayetler tekrarlanacaqlar’,- qayd etti QRM temsilcisi.