.jpg)
Vinnitsa şeher keñeşiniñ deputatı Yelena Aleksandrovna Verlan-Külşenko aqmescit ‘Hizb ut-Tahrir davası’nıñ iştirakçisi Teymur Abdullayevni öz siyasiy imayesi altına aldı.
‘Men çette qalıp olamayım. Şu sebepten de Teymur Abdullayev ve onıñ ailesini öz imayem altına almağa qarar berdim. O menim işdeşim- yuristtir. Evde onı 3 oğlu ve 2 qızı bekley. Rusiye mahkemesi onı 16.5 yılğa hapis cezasına mahküm etti. O, bir sıra işkenceden keçip, şimdi hapiste bulunmaqta’,- dedi Yelena.
Vinnitsa rayon keñeşiniñ deputatı- Natalya Vitalyevna Kravçuk siyasiy mahbüs, yalta ‘Hizb ut-Tahrir dava’sınıñ iştirakçisi Muslim Aliyevni öz siyasiy imayesi altına aldı.
‘Men bala ve aileleriniñ taqdirlerine hiç bir vaqıt pervasız qalmay edim. Sözler bile artqaçtır. Şunıñ içün siyasiy mahbüs Muslim Aliyevni öz siyasiy imayem altına alam. Beraberlikte küçlümiz. Biz yeñermiz. Qırım-Ukrainadır!’,- dedi o.
Vinnitsa rayon keñeşiniñ deputatı- Natalya Vitalyevna Kravçuk ve Viktor Borisoviç Şmigel ‘maliye terrorizmni teşkil etüv’de qabaatlanğan siyasiy mahbüs Nina Malahovanı öz siyasiy imayesi altına aldı.
‘Dünyada adaletsizlik pek çoq. Men çette qalmağa istemeyim ve kampaniyağa qoşulam. Aqmescit sakini Nina Malahovanı siyasiy imayem altına alam. RF onı 4.5 yıl hapiske mahküm etti. Onıñ qundaq balası bar. Endi bir yaşını toldurğan balanı Ninanıñ tuvğanları baqa’,- dedi o.
Hatırlatamız ki, 2016 senesi oktãbrniñ 12-sinde rusiye silãhlı küçler Teymur Abdullayevni tutuqladılar. O, RF yasaq etilgen ‘Hizb ut-Tahrir’ teşkilãtında iştirak etkeninde qabaatlanıldı. 2019 senesi 18 iyünde Şimaliy-Kavkaz arbiy mahkeme Teymur Abdullayevni 17 yıl müstemleke cezasına mahküm etti.
2016 senesi fevralniñ 11-inde rusiye silãhlı küçler Muslim Aliyevni tutuqlap, RF-nda yasaq etilgen ‘Hizb ut-Tahrir’ teşkilãtında iştirak etkeninde qabaatladı. Soñra da ‘hakimiyetni zorbalıqnen zapt etkeninde’ qabaatlanıp, 2019 senesi 12 noyabrde Rostov-na -Donu arbiy mahkeme tarafından 19 yıl hapis cezasına mahküm etildi.
2021 senesi 5 fevral künü FSB hadimleri Tatarstanda ömürarqadaşlar Ruzil Yapparov ve Nina(Latifa) Malahovanı tutuqladılar. Olarnı ‘maliye terrorizmni maddiy desteklegenleri’ içün qabaatladılar. 7 iyül künü Şimaliy arbiy mahkeme Qırım sakini Nina Malahovanı 4.5 yıl hapiske mahküm etti.