Qırım işğaliniñ başından 43 zorbalıqnen ğayıp olunma vaqiası qayd etildi

‘Zorbalıqnen ğayıp olunmalar ekseriyetnen qaçıruv şeklinde amelge keçirile edi. Neticede, 39 erkek ve 4 qadın qaçırılma qurbanları oldılar. Zorbalıqnen ğayıp olunmasınıñ ilk vaqiası 2014 senesi 3 mart künü yüz berdi, soñkisi ise 2018 senesi mayısnıñ 23-ünde qayd etilgen edi. 43 ğayıp olunğanlardan 11 erkek haqqında halã bir haber yoq, bir adam ise hapiste bulunmaqta,’- denile haberde.

Zorbalıqnen ğayıp olunmalar her halda silãhlı adamlar gruppası tarafından amelge keçirilgeni qayd etile. Qaçırğanlar işkence ve şiddet ile qurbanlarını şaatlıq etmege zorlay ya da siyasiy mevamları içün intiqam obyekti olaraq qullana ediler.

‘Zorbalıqnen ğayip olunmalar, işkence ve şiddet içün hiç kimse mesuliyetke çekilinmedi,’- urğulana beyanatta.