‘Hizb ut-Tahrir işi’ boyunca yaqalanğanlarğa domuz etini bulundırğan yemek berildi

‘Bugün Şarq arbiy mahkemesinde  Osman Arifmemetov, Yaşar Muyedinov, Ruslan Suleymanov, Rustem Şeyhaliyev ve Enver Ametovnıñ işi boyunca toplaşuv keçirildi. Teneffüste qırımtatarlarğa domuz etini bulundırğan yemek darqatıldu. Musülman olaraq, mabuslar böyle kibi yemekni aşap olamaylar.  Şundan da ğayrı, berilgen birkerelik savut ta bozulğan edi,’-denile haberde.

Hatırlatamız ki, eki yıl evel, 2019 senesi martnıñ 27-sinde, rusiye silãhlı küçler  işğal etilgen Qırımda qırımtatarlarnıñ 26 evinde tintüvler keçirdiler. Bazı cemaatçılarnıñ evinden silãhlı küçler özleri gizliden qaldırğan edebiyat tapıp çıqardılar. Kitaplardan ğayrı adamlarnıñ telefonları, bilgisayar, pasportları alına edi. Silãhlılar özlerini qaba alıp bara, yaqalanğanlarğa qarşı fizik küçüni işlete, evlerge ayaqqapnen kire, advokatlarnı yibermey ediler.Neticede 20 adam yaqalandı, olarnı Rusiyede yasaq etilgen ‘Hizb ut- Tahrir’ teşkilãtında iştirak etkenlerinde qabaatlaylar. Martnıñ 28-inde daha 3 qırımtatarı yaqalandı.  27-28 mart künleri işğalcı mahkeme 23 yaqalanğan cemaatçını hapiske aldı ve ileride hepisiniñ hapis müddeti uzatıldı.